Me rastin e 28 Nëntorit, Ditës së Flamurit dhe të Pavarësisë, kryetari i Partisë Demokratike Sali Berisha ka përcjellë një urim për shqiptarët brenda dhe jashtë vendit. Ai e cilëson këtë datë si ditëlindjen e Shqipërisë së pavarur dhe si festën më të rëndësishme të kombit shqiptar.
Berisha shprehu nderimin për Ismail Qemalin, Isa Boletinin dhe etërit e Pavarësisë, duke përkujtuar sakrificat e qindra shqiptarëve që luftuan ndër vite për lirinë dhe dinjitetin kombëtar.
Ai u ndal edhe te 28 nëntori i vitit 1944, datë që sipas tij shënoi largimin e pushtuesve të huaj, por që u pasua nga vendosja e diktaturës komuniste nën udhëheqjen e Enver Hoxhës, të cilin e cilëson si drejtues të një regjimi stalinist.
Berisha përmendi gjithashtu simbolikën historike të 28 nëntorit 1443, kur Gjergj Kastrioti Skënderbeu ngriti flamurin në Krujë, duke e quajtur prijës të përjetshëm të kombit dhe duke vlerësuar kontributin e tij në qëndresën shqiptare.
Në urimin e tij Berisha e konsideron 28 nëntorin si festën e të gjitha festave dhe u bën thirrje shqiptarëve të urojmë së bashku vendit zhvillim dhe begati. Ai shprehet me tone kritike ndaj situatës aktuale politike dhe e quan qeverinë aktuale regjimi i Pashiqit të Tiranës, duke pretenduar se në një dekadë vendi është përballur me largimin masiv të qytetarëve dhe me rënie të lindshmërisë.
Ai nënvizon se kjo ditë duhet të shërbejë si frymëzim për të çliruar Shqipërinë nga problemet politike dhe ekonomike që sipas tij e kanë dëmtuar vendin.
Në mbyllje Berisha u uron të gjithë shqiptarëve Gëzuar Ditën e Flamurit dhe Pavarësisë dhe nderon figurat historike që kanë dhënë jetën për kombin.
