Delegacioni i Bashkimit Europian në Shqipëri ka uruar qytetarët shqiptarë me rastin e Ditës së Pavarësisë dhe 113 vjetorit të shpalljes së saj. Në një urim zyrtar, delegacioni ka shprehur mesazhin Gëzuar 28 Nëntorin Shqipëri dhe Gëzuar Ditën e Pavarësisë, duke përcjellë urime për të gjithë qytetarët.
Shqiptarët brenda dhe jashtë vendit festojnë sot 113 vjetorin e shpalljes së Pavarësisë së Shqipërisë, një nga ngjarjet më të rëndësishme të historisë kombëtare. Në të gjitha qytetet e vendit zhvillohen aktivitete festive, ndërsa qendra e festimeve mbetet Vlora, vendi ku Ismail Qemali ngriti flamurin më 28 nëntor të vitit 1912.
Shqipëria u shpall e pavarur më 28 nëntor 1912 në Vlorë nga Ismail Qemali. Në shpallje morën pjesë 83 delegatë nga të gjitha trevat shqiptare dhe 40 prej tyre nënshkruan Aktin e Pavarësisë. Menjëherë pas shpalljes, Asambleja e Vlorës formoi qeverinë e parë të Shqipërisë së Pavarur, të drejtuar nga Ismail Qemali, si dhe Pleqësinë.
Kryengritja shqiptare e vitit 1912 tregoi dobësinë e Perandorisë Osmane dhe sinjalizoi një moment të ri historik për shqiptarët. Ismail Qemal bej Vlora u zgjodh kryeministër i Qeverisë së Përkohshme. Ai dha dorëheqjen më 22 janar 1914, duke ia dorëzuar pushtetin Komisionit Ndërkombëtar të Kontrollit. Më pas u largua në Itali, ku vdiq më 24 janar 1919, në rrethana të dyshimta.
Pas shpalljes së Pavarësisë, në Kuvendin e Vlorës morën pjesë delegatë nga të gjitha krahinat shqiptare, përfshirë Beratin, Skraparin, Mallakastrën, Lushnjen, Dibrën, Ohri dhe Strugën, Matin, Durrësin, Tiranën, Shijakun, Krujën, Elbasanin, Peqinin, Gjirokastrën, Përmetin, Tepelenën, Çamërinë, Delvinën, Korçën, Pogradecin, Kosovën, Shkodrën, Vlorën dhe koloninë shqiptare të Bukureshtit.
Lista përfshin personalitete si Sami Vrioni, Iljaz Vrioni, Babë Dudë Karbunara, Xhelal Koprencka, Hajredin Cakrani, Qemal bej Mullai, Myfti Vehbi Dibra, Zyhdi bej Ohri, Ahmet Zogu, Abaz Efendi Çelkupa, Dom Nikollë Kaçorri, Abdi bej Toptani, Mustafa Kruja, Lef Nosi, Veli Harxhi, Avni bej Delvina, Pandeli Cale, Hajdar Blloshmi, Mitat Frashëri, Isa Boletini, Luigj Gurakuqi, Ismail Qemali dhe shumë të tjerë.
Delegacioni i Bashkimit Europian përcolli një mesazh miqësor për Shqipërinë në këtë ditë simbolike, duke theksuar rëndësinë e marrëdhënieve të qëndrueshme mes palëve dhe uruar qytetarëve festën kombëtare.
