Dy persona janë shpallur në kërkim pasi dyshohet se janë përfshirë në trafikimin e automjeteve të vjedhura me qëllim shitjen e tyre në Shqipëri. Gjatë veprimeve hetimore, policia ka sekuestruar dy automjete të tipit “Audi A6” dhe “Audi A5”, me vlerë të përllogaritur rreth 105 mijë euro.
Në kërkim janë shpallur:
- V. M(L)., i dyshuar për trafikimin e një automjeti “Audi A6”, i cili rezulton i vjedhur në Gjermani;
- J. C., i dyshuar për trafikimin e një automjeti “Audi A5”, i cili rezulton i vjedhur në Bullgari.
Dy mjetet janë prodhime të viteve të fundit dhe u sekuestruan si prova materiale në kuadër të operacionit policor “Stolen Line”, i cili vijon prej disa ditësh. Një ditë më parë, në të njëjtin operacion, u sekuestruan edhe dy automjete të tjera me vlerë rreth 110 mijë euro.
Specialistët e Seksionit për Hetimin e Trafiqeve të Paligjshme të DVP Tiranë po vijojnë verifikimet për goditjen e aktivitetit të trafikimit të mjeteve luksoze të vjedhura. Materialet procedurale janë referuar Prokurorisë për veprime të mëtejshme.
