Shqipëria dhe shqiptarët kudo ndodhen festojnë sot 113-vjetorin e shpalljes së Pavarësisë, një nga momentet më të rëndësishme të historisë kombëtare. Kjo ditë përbën një gur kilometrik që bashkon trevat shqiptare në nderim, mirënjohje dhe krenari.
Presidentja e Kosovës, Vjosa Osmani, ka uruar të gjithë shqiptarët me rastin e Ditës së Flamurit. Në mesazhin e saj, ajo theksoi se Kosova dhe Shqipëria sot qëndrojnë pranë njëra-tjetrës, si dy shtete që përfaqësojnë një komb, me dy flamuj e një zemër.
Osmani kujtoi se 28 Nëntori është një ditë që mbart disa prej ngjarjeve më të rëndësishme për kombin shqiptar: shpalljen e Pavarësisë së Shqipërisë, lindjen e Adem Jasharit dhe daljen e parë publike të UÇK-së. Ajo përmendi gjithashtu figurat historike dhe vendet simbolike të rezistencës shqiptare, nga Kruja e Skënderbeut te Vlora e Ismail Qemalit e deri te Prekazi i familjes Jashari.
Në urimin e saj, presidentja u shpreh:
“Gëzuar Ditën e Flamurit dhe Pavarësinë e Shqipërisë! Lavdi Komandantit Adem Jashari dhe të gjithë heronjve, dëshmorëve dhe martirëve të kombit tonë.”
