Lumi Vjosa ka dalë sërish nga shtrati si pasojë e prurjeve të mëdha të shkaktuara nga reshjet e dendura në jug të vendit, duke shkaktuar përmbytje në zonën e pazarit të kafshëve.
Derbi në orën 14:00, niveli i ujit në urën e Mifolit ka arritur në 6.9 metra, ndërsa prurjet vijojnë të rriten. Sipas parashikimeve të emergjencave civile, reshjet intensive pritet të vijojnë edhe gjatë orëve në vijim, sidomos në zonat jugore, përfshirë Përmetin, çka mund ta rrisë më tej nivelin e lumit.
Autoritetet kanë njoftuar banorët që rrezikohen nga përmbytjet, përfshirë 13 banesa pranë lumit, të tregojnë kujdes dhe të jenë të përgatitur për çdo situatë emergjente. Një thirrje është bërë edhe për banorët e njësisë administrative Novoselë, të cilët mbajnë bagëti në tokat që përmbyten shpesh, që të marrin masa mbrojtëse dhe të shmangin zonat pranë lumit.
