E Dërguara e Posaçme e Kryetares së Radhës të OSBE-së, ambasadorja Terhi Hakala, ka përfunduar vizitën e saj zyrtare në Shqipëri, e cila u përqendrua në forcimin e partneritetit të OSBE-së në vend dhe në rajonin e Evropës Juglindore.
Gjatë qëndrimit në Tiranë, ambasadorja zhvilloi takime me ministren për Evropën dhe Punët e Jashtme, Elisa Spiropali, si dhe me përfaqësues të trupit diplomatik dhe organizatave rinore të shoqërisë civile.
Në kuadër të vizitës, Hakala hapi Konferencën Rajonale mbi Dhunën me Bazë Gjinore Online dhe mori pjesë në aktivitetin kushtuar 50-vjetorit të Aktit Final të Helsinkit. Ajo theksoi se për Kryesinë finlandeze, barazia gjinore dhe gjithëpërfshirja janë prioritete të rëndësishme, duke vënë në dukje rolin e shoqërisë civile, veçanërisht të të rinjve dhe personave me aftësi të kufizuara, në proceset vendimmarrëse.
Ambasadorja zhvilloi gjithashtu një takim me stafin e Prezencës së OSBE-së në Shqipëri, ku vlerësoi përkushtimin dhe punën e tyre shumëvjeçare. “Prej gati tri dekadash, Prezenca ka qenë një partner i besueshëm, duke mbështetur vendin në përmbushjen e angazhimeve ndaj OSBE-së,” u shpreh Hakala.
Gjatë diskutimeve me organizatat rinore, ajo u ndal te bashkëpunimi në fushat e shtetit të së drejtës, forcimit të institucioneve demokratike, reformës zgjedhore, të drejtave të njeriut, barazisë gjinore dhe përfshirjes së të rinjve.
Finlanda, në rolin e Kryesueses së OSBE-së, i ka kushtuar vëmendje të veçantë fuqizimit të shoqërisë civile dhe promovimit të gjithëpërfshirjes, përfshirë edhe në konferencën Helsinki+50 të mbajtur në korrik, e cila shënoi 50-vjetorin e Aktit Final të Helsinkit.
