Gjykata e Shkallës së Parë në Shkodër ka vendosur masën e sigurisë “arrest me burg” për Erzen Ukën dhe Julian Cumrakun, të dyshuar për veprimtari të lidhura me terrorizmin. Seanca për caktimin e masës u zhvillua në orën 13:00, ku u vendos që të dy të qëndrojnë në paraburgim gjatë zhvillimit të hetimeve.
Uka dhe Cumraku u dorëzuan ndaj forcave RENEA pas rreth 12 orësh negociatash. Ata ndodheshin të fshehur në një banesë në fshatin Orosh, në zonën e Fushë-Arrëzit, ku dyshohet se kishin qëndruar për afërsisht dy muaj.
Gjatë kontrollit të banesës u sekuestrua një arsenalin armësh, përfshirë 4 automatikë, 1 pistoletë, 18 granata, 7 karikatorë të mbushur dhe rreth 2,000 municione të ndryshme.
Ngjarja nisi kur një patrullë policie konstatoi një person të dyshuar që hyri me shpejtësi në një banesë të braktisur. Pas kërkesës së policisë për t’u dorëzuar, ai refuzoi dhe i kërcënoi efektivët, çka çoi në ndërhyrjen e forcave RENEA. Ndërhyrja u finalizua me dorëzimin e të dyshuarve, pas ndihmës së familjarëve.
