Janë zbuluar detaje të reja lidhur me arrestimin e oficerit të Antiterrorit, Igli Haxhiaj, i cili u ndalua në kuadër të një operacioni të koordinuar mes Prokurorisë së Posaçme dhe autoriteteve italiane. Masa e sigurisë është ekzekutuar në ambientet e Akademisë së Policisë, ku Haxhiaj po ndiqte një kurs tre mujor specializimi për çështje të Antiterrorit.
Operacioni u krye nga Agjencia e Mbikëqyrjes Policore (AMP), ndërsa arrestimi ka surprizuar kolegët e tij, pasi prangat iu vendosën gjatë orëve të trajnimit.
Sipas të dhënave hetimore, Haxhiaj akuzohet për disa vepra penale, përfshirë nxjerrje të sekretit hetimor, korrupsion dhe shpërdorim detyre. Dyshohet se veprimet e pretenduara janë kryer gjatë periudhës kur ai shërbente në strukturat e Forcave Operacionale, para transferimit në sektorin e Antiterrorit.
Hetimet po vijojnë në bashkëpunim me autoritetet italiane, ndërsa priten zhvillime të tjera që do të përcaktojnë shkallën e përfshirjes së tij në aktivitetet e dyshuara kriminale.
