Një oficer i Antiterrorit është arrestuar gjatë operacionit të zhvilluar mes Prokurorisë së Breshias dhe SPAK, sipas burimeve të konfirmuara. Oficeri Igli Haxhiaj dyshohet se ka pasur lidhje me grupin kriminal të goditur dhe akuzohet për nxjerrje të sekretit hetimor, korrupsion dhe shpërdorim detyre.
Operacioni ndërinstitucional synoi një rrjet të strukturuar kriminal, të identifikuar nga mediat italiane si pjesë e mafies shqiptare, i cili merrej me trafikun e lëndëve narkotike nga Amerika Latine dhe Shqipëria drejt Italisë. Sipas hetimeve të Policisë së Breshias, grupi kishte ngritur baza operative në zonat Rovato dhe Palazzolo.
Transporti dhe shpërndarja e drogës ishin nën kontrollin e klaneve shqiptare. Autoritetet italiane kanë lëshuar 22 masa sigurie, ndërsa 8 persona janë arrestuar në territorin italian. Në total janë marrë nën hetim 49 persona, nga të cilët 46 janë shqiptarë.
Gjatë operacionit u sekuestruan rreth 3 milionë euro të dyshuara si të ardhura nga aktiviteti kriminal. Hetuesit vlerësojnë se fitimet nga trafiku i drogës arrinin në rreth 12 milionë euro. Kokaina mbërrinte nga Amerika e Jugut, ndërsa heroina transportohej nga Shqipëria në drejtim të Italisë.
Hetimi gjithashtu ka zbuluar se disa prej shoferëve të autobusëve që përdoreshin në skemën e transportit nuk ishin në dijeni të ngarkesave narkotike që po transportoheshin.
