Detaje të reja janë zbardhur nga operacioni i përbashkët mes autoriteteve italiane dhe shqiptare që ka goditur një nga rrjetet më të mëdha të trafikut ndërkombëtar të drogës, me bazë në provincën e Brescias. Në kuadër të këtij operacioni janë firmosur 24 masa sigurie dhe janë marrë nën hetim 49 persona, prej të cilëve 46 janë shtetas shqiptarë.
Sipas hetimeve, grupi kriminal kishte ngritur baza operative në zonat Rovato dhe Palazzolo, prej nga menaxhonte importimin dhe shpërndarjen e lëndëve narkotike në territorin italian. Rrjeti, i përbërë nga klane shqiptare, kishte krijuar një infrastrukturë të mirëorganizuar për transportin dhe qarkullimin e drogës.
Kokaina mbërrinte nga Amerika e Jugut, ndërsa heroina trafikohej nga Shqipëria drejt Italisë. Ngarkesat transportoheshin me kamionë të modifikuar me vende të fshehta dhe shpërndaheshin më pas në gjashtë qendra logjistike që shërbenin si depo dhe pika shpërndarjeje.
Autoritetet italiane bëjnë të ditur se grupi ka trafikuar mbi 1,300 kilogramë kokainë gjatë aktivitetit të tij, ndërsa gjatë aksionit janë sekuestruar 550,000 euro, dhjetë automjete, një armë dhe 130 kilogramë lëndë narkotike. Sasia e sekuestruar vlerësohet se do të kishte gjeneruar rreth 12 milionë euro në treg.
Grupi kishte krijuar edhe një skemë për transferimin e fitimeve drejt drejtuesve në Shqipëri, përmes shoferëve të autobusëve që transportonin shuma të mëdha parash në mënyrë të paidentifikuar.
Operacioni është realizuar me pjesëmarrjen e mbi 150 efektivëve të Guardia di Finanza dhe njësive speciale, me mbështetjen e Europol, Eurojust dhe autoriteteve të tjera ndërkombëtare. Hetimet janë zhvilluar në kuadër të një Ekipi të Përbashkët Hetimor me Shqipërinë dhe Zvicrën, duke përdorur teknika të avancuara si deshifrimi i komunikimeve të koduara, përgjimet dhe vëzhgimin intensiv në terren.
Kontrollet dhe veprimet operacionale vijojnë në disa zona të Italisë, të asistuara nga njësitë e specializuara dhe teknologjia moderne hetimore.
