Një tjetër rast prostitucioni është zbuluar në Durrës, ku dy vajza nga Brazili janë arrestuar si pjesë e operacionit policor të koduar “STORM”. Nën hetim mbetet edhe një 22-vjeçar nga Durrësi, i proceduar në gjendje të lirë.
Të rejat, të identifikuara si B. B., 24 vjeçe dhe H. D., 21 vjeçe, kishin marrë me qira një apartament në lagjen nr. 2 të qytetit, të cilin e përdornin për ushtrim prostitucioni dhe për konsumimin e lëndëve narkotike. Gjatë ndërhyrjes, ato i bënë rezistencë policisë duke refuzuar të hapnin derën, e cila u hap më pas me ndihmën e zjarrfikësve.
Gjatë kontrollit, policia sekuestroi si prova materiale dy pasaportat e vajzave, një shumë parash në euro dhe lekë, tre celularë, një bllok shënimesh, disa karta SIM, si dhe dy sasi të vogla lënde narkotike të dyshuara kanabis dhe çokollatë me përmbajtje kanabis.
Vajzat akuzohen për veprat penale “Prostitucioni”, “Përshtatja e ambienteve për prostitucion”, “Prodhimi dhe shitja e lëndëve narkotike”, dhe “Përshtatja e ambienteve për përdorim droge”.
Materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Durrës për vijimin e hetimeve.
