Një ngjarje e rëndë ka ndodhur në fshatin Mlizë, në Njësinë Administrative Gjinar, Elbasan, ku një 40-vjeçar ka humbur jetën pasi u rrëmbye nga rrjedha e fuqishme e përroit pranë zonës.
Ngjarja ka ndodhur ditën e djeshme, kur viktima, Florian Tahiri, dyshohet se po kalonte mbi urë në momentin kur prurjet e mëdha të shkaktuara nga reshjet e ditëve të fundit e tërhoqën me forcë. Pasi ai nuk ishte kthyer në shtëpi për drekë, familjarët nisën kërkimet përgjatë shtratit të përroit.
Pamjet e sigurisë së disa bizneseve në afërsi kanë dokumentuar momentin kur 40-vjeçari u rrëmbye nga uji, duke ndihmuar grupet e kërkimit në përcaktimin e drejtimit të lëvizjes së trupit.
Ekipet e zjarrfikësve dhe strukturat e emergjencave civile kanë vijuar kërkimet gjatë natës. Trupi i pajetë i Florian Tahirit u gjet mëngjesin e sotëm, rreth një kilometër larg vendit ku dyshohet se ndodhi aksidenti.
Autoritetet po vijojnë hetimet për zbardhjen e plotë të ngjarjes, ndërsa komuniteti lokal është i tronditur nga humbja tragjike.
