Zëvendësministri i Bujqësisë dhe Zhvillimit Rural, Arian Jaupllari, ka njoftuar ndarjen nga jeta të një punonjëseje të ministrisë, e njohur me emrin Tela. Në një mesazh të publikuar në rrjetet sociale, ai shprehu dhimbjen e thellë për humbjen e saj.
Jaupllari e përshkroi Telën si një person që i jepte zgjidhje çdo situate në ministri, duke theksuar se humbja e saj përbën një goditje të madhe për të gjithë stafin. Sipas tij, ajo ishte simbol i profesionalizmit, urtësisë, mençurisë, drejtësisë, thjeshtësisë dhe dashurisë ndaj të gjithëve.
Në mesazhin e tij ai shkroi:
“Me dhimbje të madhe po shkruaj disa fjalë që nuk do të doja t’i shkruaja kurrë për ty, Tela. Iku Tela e gjithë ministrisë. Humbëm një simbol të profesionalizmit dhe urtësisë. I lehtë qoftë dheu. Lamtumirë, Tela jonë.”
