Humbja 1-2 ndaj Pogradecit në stadiumin “Roza Haxhiu” ka ndezur revoltën e qytetarëve, sportdashësve dhe specialistëve lushnjarë, të cilët kërkojnë ndryshime të menjëhershme në mënyrën si po drejtohet ekipi i tyre i zemrës.
Reagimet në rrjetet sociale, por edhe jashtë kamerave, janë të forta. Mbështetësit e verdhejeshilëve kërkojnë që lojtarët dhe drejtuesit të vlerësohen për atë që japin në fushë, jo për emrin apo kontratat e majme.
“Kush nuk jep maksimumin, të largohet. Boll më me lojtarë që vijnë të ulen në stol. Të futet ai që lufton për fanellën,” shprehen tifozët.
Një tjetër kërkesë e rëndësishme është që pagat të lidhen me rendimentin, ndërsa kontratat të rishikohen nga një komision i posaçëm, pasi dyshimet për pagesa të panevojshme dhe lojtarë pa nivel kanë ngritur pikëpyetje serioze mbi menaxhimin aktual.
Kritika të forta shkojnë edhe për akademinë sportive. Sportdashësit theksojnë se Lushnja ka talente, por ato nuk po marrin mundësinë për të dalë në fushë.
“Duam një trajner lushnjar, që e njeh shpirtin e qytetit dhe e ndjen peshën e fanellës,” theksojnë qytetarët.
Mesazhi i tifozëve është i qartë: Ekipi duhet të ndërtohet me lojtarë lushnjarë dhe drejtues me vizion, të cilët e duan fanellën verdhejeshilë dhe japin maksimumin për të.
Fanella e Lushnjës kërkon djersë, zemër dhe dinjitet – dhe qyteti nuk pranon më asgjë më pak se kaq.
