Gjykata e Posaçme e Shkallës së Parë për Korrupsionin dhe Krimin e Organizuar ka shpallur fajtorë Dritan Stokën, zyrtar i Agjencisë Shtetërore të Kadastrës, dhe Agim Osman, kryeplakun e Lagjes së Re në Sauk, për blerje votash dhe ndikim të paligjshëm gjatë fushatës për zgjedhjet vendore të vitit 2019.
Sipas vendimit të dhënë më 26 nëntor, Stoka dhe Osma janë shpallur fajtorë për veprat penale “Ushtrim i ndikimit të paligjshëm ndaj personave që ushtrojnë funksione publike” dhe “Korrupsion aktiv në zgjedhje”, të kryera në bashkëpunim.
Dritan Stoka u dënua me 3 vite burg, të reduktuara në 2 vite për shkak të gjykimit të shkurtuar.
Edhe Agim Osma mori të njëjtin dënim prej 2 vitesh, por gjykata vendosi pezullimin e ekzekutimit të dënimit, duke e vendosur atë në provë për 24 muaj.
Hetimet e SPAK zbuluan se të pandehurit kërkonin nga zgjedhësit të përgatisnin lista votuesish, të përcaktonin mënyrën e votimit apo të votonin në këmbim të:
- mbajtjes në punë
- përfitimeve të parregullta
- pajisjes me leje legalizimi për ndërtimet pa leje në zonën e Saukut
Gjithashtu, nga përgjimet rezulton se Stoka dhe Osma kanë kërkuar dhe marrë favore në këmbim të ndikimit të tyre për procesin e legalizimeve.
Kjo çështje lidhet me zgjedhjet vendore të vitit 2019, në të cilat opozita nuk mori pjesë dhe gara u zhvillua vetëm mes kandidatëve të Partisë Socialiste, që i fitoi zgjedhjet në rang vendi.
