Arbër Abazi, pronari i kompanisë Alko Impex, është thirrur të paraqitet në SPAK më 2 dhjetor, sipas një fletëthirrjeje të firmosur nga prokurori Dritan Prençi. Abazi do të pyetet në cilësinë e personit në dijeni në lidhje me një çështje të regjistruar si procedimi penal 72/2025.
Burime të Kapitali.al bëjnë me dije se hetimi lidhet me një kallëzim të bërë nga avokatët e biznesmenit Irfan Hysenbelliu, pasi ai dhe familjarët e tij u kërcënuan me jetë në muajin gusht. Në atë kohë, BalkanWeb raportoi se kërcënimi dyshohej të vinte nga një person me lidhje të forta në nivelet e larta të qeverisë, i përmendur më herët në emisione investigative për skema të dyshuara korruptive.
Arbër Abazi konsiderohet një nga përfituesit më të mëdhenj të fondeve publike në vend. Vetëm në pesë vitet e fundit, dy kompanitë e tij – Alko Impex Construction dhe Alko Impex General Construction – kanë përfituar mbi 90 milionë euro pagesa nga buxheti i shtetit, kryesisht në tendera pastrimi në shumë bashki të vendit.
Opozita ka akuzuar prej kohësh se Abazi është favorizuar në prokurimet publike për shkak të lidhjeve familjare me Belinda Ballukun, e cila aktualisht është nën hetim nga SPAK.
Thirrja për biznesmenin vjen një ditë pasi SPAK konfirmoi nisjen e një procedimi të ri penal ndaj Belinda Ballukut dhe deputetit socialist Ceno Klosi, të afërt me të.
