SPAK ka përfunduar hetimet dhe ka çuar për gjykim dosjen për vrasjen e Fatbardh Licit, ngjarje e ndodhur më dhjetë gusht dy mijë e tetëmbëdhjetë në Shkodër. Katër persona janë marrë të pandehur: Behar Bajri, Safet Rustemi (Bajri), Astmer Bilali dhe Eria Ago, të dyshuar si bashkëpunëtorë në ekzekutimin e planifikuar në kuadër të konfliktit të gjatë mes fiseve Bajri dhe Lici, për kontrollin e zonës.
Sipas hetimeve, vrasja erdhi pas ekzekutimit të Boran Bërcanës dhe bashkëshortes së tij, Silvi Ndoci, që i ndezi edhe më tej tensionet mes grupeve rivale. Behar Bajri e konsideroi këtë ngjarje si vepër të Ibrahim Licit, nipit të viktimës Fatbardh Lici. Në vijim, ai, së bashku me Safet Rustemin dhe Astmer Bilalin, organizuan atentatin ndaj xhaxhait të Ibrahimit.
Më dhjetë gusht, Astmer Bilali zbriti nga një makinë e vjedhur Benz afër lokalit ku viktima pinte rregullisht kafe dhe e qëlloi disa herë me armë zjarri, duke e lënë të vdekur në vend. Mjeti u largua drejt Dobraçit, ku më pas u dogj.
Pas krimit, Safet Rustemi qëndroi në Shkodër, ndërsa Astmer Bilali u largua drejt Tiranës së bashku me Eria Ago, e cila dyshohet se e ka ndihmuar të fshihej pas ngjarjes.
Dosja i është dërguar Gjykatës së Posaçme të Shkallës së Parë, ndërsa katër të pandehurit do të përgjigjen në gjyq për rolet e tyre në ekzekutimin e Fatbardh Licit.
