Presidenti francez Emmanuel Macron ka shprehur shqetësimin se Franca dhe vendet e tjera të Bashkimit Evropian janë brenda rrezes operative të raketave balistike të prodhuara nga Rusia.
Sipas tij, Moska vazhdon të prodhojë nëndetëse, raketa dhe tanke, të cilat i vendos në frontin ukrainas dhe potencialisht për të ushtruar presion mbi Evropën, nëse Bashkimi Evropian paraqet dobësi. Ai theksoi se Rusia disponon një gamë të plotë armësh strategjike.
“Ne jemi brenda rrezes së veprimit të këtyre sistemeve. Raketat balistike ndërkontinentale, të gjithë ne jemi të kërcënuar prej tyre”, deklaroi Macron.
Ndërkohë, presidenti rus Vladimir Putin ka hedhur poshtë shqetësimet e udhëheqësve evropianë, duke i cilësuar ato si të pabaza. Në të njëjtën linjë, ministri i Jashtëm rus Sergey Lavrov, gjatë fjalës së tij në sesionin e tetëdhjetë të Asamblesë së Përgjithshme të Kombeve të Bashkuara, tha se Rusia nuk ka pasur dhe nuk ka asnjë synim për të sulmuar NATO-n ose Bashkimin Evropian.
Deklaratat e palëve reflektojnë klimën e tensionuar të sigurisë në Evropë, ndërkohë që lufta në Ukrainë vazhdon të ndikojë në marrëdhëniet mes Rusisë dhe Perëndimit.
