Ilir Shtufi, një nga ndërtuesit e kullës shumëkatëshe të njohur si “Mali i Tiranës” në zemër të kryeqytetit dhe i njohur për lidhje të forta klienteliste me Shkëlzen Berishën, djalin e ish-kryeministrit Sali Berisha, rezulton të jetë favorizuar nga Ministrja e Infrastrukturës dhe Energjisë, Belinda Balluku, për të fituar tendera rrugësh.
Në dosjen e SPAK zbardhen komunikimet e Belinda Ballukut me ish-kreun e Autoritetit Rrugor Shqiptar, Evis Berberi, i cili prej një viti e gjysmë ndodhet në burg për korrupsion, pastrim parash dhe akuza të tjera. Balluku i kërkon Berberit të kontaktojë me Ilir Shtufin.
“Nga akti i ekspertimit nr. 195, datë 26.09.2024, i aparatit celular ‘Blackberry’, model ‘BBF100-6’, të sekuestruar shtetasit Evis Berberi, nga nxjerrja e të dhënave teknike kompjuterike të përmbajtura në këtë aparat, kanë rezultuar komunikime ndërmjet shtetasve Belinda Balluku, Evis Berberi dhe Ilir Shtufi, si më poshtë:
Më datën 10.09.2021, në orën 10:46, Belinda Balluku i dërgon mesazh Evis Berberit: ‘Hajde tek unë në 11’.
Në orën 10:46, Evis Berberi përgjigjet: ‘Erdha’.
Në orën 13:00–13:01, Belinda Balluku: ‘Çdo gjë ok Lenci me Pellumb. Prite pak Ilir Shtufin e Nova dhe bëja të qartë që shkon me EUT. Dhe mos ta shoh në vend tjetër. Punët i ke me Gim thuaj, jo me mua’.
Në orën 13:01, Evis Berberi: ‘Ok’.
Menjëherë pas këtij komunikimi, po më 10.09.2021, shtetasi Evis Berberi komunikon me Ilir Shtufin. Në orën 13:54–13:55, Ilir Shtufi i shkruan: ‘Përsh si të kam… Ilir Shtufi Nova jam. Të tak pak, më kanë thënë kur mundesh’.
Në orën 14:07, Evis Berberi: ‘Hajde, kalo’.
Në orën 14:07, Ilir Shtufi: ‘Ok, 10 min’.
Menjëherë pas këtij shkëmbimi, në orën 15:09, Evis Berberi i shkruan Belinda Ballukut: ‘E takova ok’, duke iu referuar instruktimeve të saj për ‘Ilir Shtufin e Nova dhe që shkon me EUT’.
Nga hetimi rezulton se shoqëria “Nova Construction 2012” sh.p.k. (me pronar Ilir Shtufin) më 14.09.2021 – vetëm 4 ditë pas këtyre komunikimeve – ka lidhur kontratë bashkëpunimi me shoqëritë “Euroteorema Peqin” sh.p.k. dhe “PE-VLA-KU” sh.p.k., për të marrë pjesë në procedurën e prokurimit REF-02817-08-13-2021, me objekt “Ndërtim i Unazës së Jashtme Tiranë, Loti 4”, ku janë shpallur fitues.
“Evidentohet fakti se, ende pa u mbyllur faza e dorëzimit të ofertave (afati i fundit ka qenë data 15.09.2021), pra pa u evidentuar shoqëritë pjesëmarrëse, shtetasit Belinda Balluku dhe Evis Berberi kanë pasur dijeni për fituesin e paracaktuar të procedurës së prokurimit, pasi u ishin dhënë kriteret më parë”, thuhet në dosje.
Ndërkohë, ende nuk dihet statusi i biznesmenit Ilir Shtufi në këtë dosje, ndërsa zyrtarisht ai është nën hetim nga SPAK për financimin e kullës që njihet si “Mali i Tiranës”. Për këtë dhe përfshirjen e tij në Lotin 4 të Unazës së Tiranës, opozita vazhdon të heshtë, ndonëse ka kërkuar shpesh dorëheqjen e Ballukut dhe Ramës për dosjen e tunelit të Llogarasë.
Për tenderin e ndërtimit të Lotit 4 të Unazës së Madhe, zv.kryeministrja Belinda Balluku është nën hetim, ndërsa është shpallur e pandehur edhe për tenderin 190 milionë euro të tunelit të Llogarasë. Të shtunën, GJKKO konfirmoi masat e sigurisë “pezullim nga ushtrimi i funksionit” si zv.kryeministre dhe ministre, si dhe “ndalim të daljes jashtë vendit”. Ndërsa Gentian Gjyli, kreu i ARRSH, dhe Erald Elezi, administrator i KESH, do të vijojnë me masën e arrestit në shtëpi.
