Këngëtarja shqiptare me famë botërore, Rita Ora, ka bërë një rrëfim të pazakontë gjatë një interviste për podcastin Happy Hour Overheard, ku ka zbuluar se beson se mund të jetë një “magjistare”. Sipas saj, kjo është diçka që trashëgohet në familjen e saj dhe që lidhet me lidhjen shpirtërore që ajo ndjen me universin.
“Gjyshja ime ka qenë me siguri një magjistare, për nënën nuk jam e sigurt nëse e ka atë gjen, por unë mendoj se me siguri e kam,” u shpreh artistja 34-vjeçare me humor, duke shtuar se ndonjëherë ndjen intuita dhe energji të forta që e drejtojnë në vendimet e saj.
Rita, e njohur për dashurinë ndaj yogas, astrologjisë dhe praktikave shpirtërore, tregoi se edhe dasma e saj me regjisorin Taika Waititi ka qenë një ceremoni “shpirtërore dhe simbolike”. “Ndihem e lidhur me botën shpirtërore përmes ritualeve që më ndihmojnë të ruaj qetësinë dhe ekuilibrin,” tha ajo.
Artistja rrëfeu se praktikon lexime tarot-i çdo javë, sepse i japin ndjesinë e sigurisë dhe shpresës. “Në fund të fundit, mjafton që diçka të të japë shpresë,” theksoi ajo.
Rita Ora tha se beson “100 për qind” në astrologji dhe e konsideron atë diçka më shumë se një pasion. “Mendoj se astrologjia duhet të jetë një fe më vete. Më pëlqen ideja që shpirtrat të udhëheqin në rrugën tënde,” shtoi ajo.
Këngëtarja tregoi gjithashtu për rutinën e saj para koncerteve, që ndryshe nga shumica e artistëve, është e qetë dhe medituese. “Njerëzit ndoshta dëgjojnë muzikë të fortë apo pijnë alkool para performancës, por unë jam e kundërta. Më pëlqen të zgjas trupin, të vendos muzikë të qetë dhe të avulloj fytin tim. Gjithçka është shumë zen,” u shpreh ajo.
Në një intervistë tjetër, Rita ka rrëfyer se një fallxhore “i ndryshoi jetën”, duke i dhënë një këshillë që e ndihmoi të bëhet më e duruar. “Ajo më tha: ‘Jeta jote është si një grusht rëre që mund të rrëshqasë nga duart në çdo moment. Kujdesu ta mbash me kujdes dhe ec me ngadalë.’ Që nga ajo ditë, përpiqem të mos reagoj me impuls,” kujtoi artistja.
Rita Ora dhe bashkëshorti i saj, Taika Waititi, u martuan në vitin 2022 në një ceremoni intime me vetëm tre të ftuar. Kohët e fundit, fansat vunë re në një video të publikuar nga Rita një foto të çiftit gjatë dasmës, ku ajo shfaqej me një fustan dantelle të bardhë nga Tom Ford, duke puthur regjisorin fitues të Oscar-it në një moment plot ndjesi romantike.
