Reshjet intensive të ditës së sotme kanë rritur ndjeshëm prurjet e lumenjve në qarkun e Fierit, duke shkaktuar rrezik të lartë për përmbytje në disa zona pranë lumit Vjosë.

Sipas raportimeve nga Klan News, në Ura e Mifolit situata është përkeqësuar ndjeshëm, ndërsa në Memaliaj niveli i ujit është ulur disi krahasuar me orët e mëparshme.

Gazetarja Anila Sefa bëri të ditur se, sipas matjeve më të fundit, Vjosa ka arritur nivelin prej 8.2 metrash, duke shënuar një rritje të konsiderueshme dhe duke rritur rrezikun për përmbytje në zonat bujqësore dhe banesat përreth.

Ekspertët paralajmërojnë se, nëse reshjet vazhdojnë me këtë intensitet, niveli i lumit mund të rritet më tej, duke rrezikuar përmbytje në disa fshatra të Fierit dhe zonave fushore të afërta.

Ndërkohë, autoritetet lokale dhe strukturat e emergjencave civile po monitorojnë situatën në kohë reale dhe kanë bërë apel ndaj banorëve që të shmangin zonat e rrezikuara dhe të ndjekin udhëzimet e institucioneve përgjegjëse.