Ryan Wedding, ish-pjesëtar i skuadrës olimpike kanadeze të snowboard-it, është përfshirë në listën e 10 personave më të kërkuar nga FBI. Ai akuzohet për vrasjen e një dëshmitari federal dhe për drejtimin e një rrjeti ndërkombëtar të trafikut të drogës.

Hetimet zbuluan se Wedding kishte vendosur një shpërblim për eliminimin e dëshmitarit, në mënyrë që të shmangte akuzat penale ndaj tij dhe rrjetit që kontrollonte.

Sipas Prokurores së Përgjithshme të SHBA, Pam Bondi, Wedding drejton një nga organizatat më të mëdha kriminale në botë, e cila është përgjegjëse për importimin e 60 tonëve kokainë në vit nga Meksika në Los Angeles, ndërsa është furnizuesi kryesor i kokainës në Kanada.

Wedding është në kërkim për vrasjen me armë zjarri të një personi në një restorant, i cili do të dëshmonte kundër tij. Ai përballet me akuza të rënda për vrasje, pastrim parash, trafik droge dhe intimidim të dëshmitarëve.

Në të njëjtën aktakuzë përfshihen edhe disa persona të tjerë, mes tyre një avokat kanadez që dyshohet se ka qenë i përfshirë në vrasjen e dëshmitarit. Departamenti Amerikan i Shtetit ka shpallur një shpërblim prej 15 milionë dollarësh për çdo informacion që çon në arrestimin e tij, një rritje nga 10 milionë dollarë që ishte më parë.