Kosova barazoi 1-1 me Zvicrën në “Fadil Vokrri”, duke siguruar play off-in, ndërsa ndeshjet e tjera vendosën kualifikime dhe eliminime dramatike në grupet europiane.
Emocione të forta dhe tension deri në minutën e fundit në ndeshjet përmbyllëse të kualifikueseve të Botërorit. Kosova arriti një barazim 1-1 ndaj Zvicrës në stadiumin “Fadil Vokrri”, duke ruajtur vendin e dytë në Grupin B dhe duke siguruar pjesëmarrjen në fazën Play off.
Përfaqësuesja e Zvicrës, me këtë rezultat, vulosi kualifikimin e drejtpërdrejtë në Botëror. Në lojën e zhvilluar në Prishtinë, Muslija i Kosovës i dha përgjigje golit fillestar të Vargas, duke i dhënë dardanëve një pikë të merituar.
Ndërkohë në Grupin H, ndeshja Austri–Bosnjë përfundoi 1-1. Barazimi i mjaftoi Austrisë për të kaluar direkt në Kupën e Botës, ndërsa Bosnja do të kërkojë kualifikimin përmes Play off-it.
Në Grupin J, Maqedonia e Veriut humbi çdo shans për fazën Play off pas një disfate të rëndë 7-1 ndaj Uellsit. Përfaqësuesja maqedonase kishte nevojë për një rezultat pozitiv, por u dominua tërësisht nga britanikët.
Në të njëjtin grup, Belgjika shënoi një fitore të thellë 7-0 ndaj Liechtenstein, duke siguruar pa vështirësi kualifikimin direkt. Belgët konfirmuan epërsinë e tyre duke mbyllur fazën në krye të renditjes.
Ndërkohë në Grupin C, Skocia e mbylli rrugëtimin si kokë grupi. Triumfi 4-2 ndaj Danimarkës i dha skuadrës skoceze primatin, duke lënë pas danezët që tashmë duhet të kërkojnë mundësinë e kualifikimit në rrugë alternative.
Ndeshjet e fundit të kësaj faze sollën rezultate të pritshme, surpriza të hidhura dhe emocion deri në fund, duke kompletuar tablonë e skuadrave që do të vijojnë garën drejt Botërorit 2026.
