Ushtria amerikane ka goditur një tjetër mjet të dyshuar për trafik droge në Oqeanin Paqësor Lindor, duke vrarë tre persona, një operacion që po nxit debate të forta politike në SHBA për mënyrën se si po përdoret forca ushtarake.
Ushtria e Shteteve të Bashkuara ka kryer një tjetër sulm ndaj një skafi të dyshuar për trafik narkotikësh në Paqësorin Lindor, deklaroi të dielën Komanda Jugore e SHBA-së. Sipas njoftimit, tre persona mbetën të vrarë pas goditjes së urdhëruar nga Sekretari i Mbrojtjes, Pete Hegseth.
Komanda Jugore njoftoi se skafi drejtohej nga një “Organizatë e Designuar Terroriste” dhe lundronte në ujëra ndërkombëtare në një korridor të njohur për trafikun e drogës. Inteligjenca, sipas saj, kishte konfirmuar ngarkesën e paligjshme.
NBC News nuk e ka verifikuar në mënyrë të pavarur versionin zyrtar të ushtrisë amerikane. Administrata nuk ka paraqitur prova për mbështetjen e pretendimeve mbi aktivitetin e anijes apo identitetin e personave të vrarë.
Pamjet e publikuara nga Komanda Jugore tregojnë një shpërthim të fuqishëm pranë skafit, duke shkaktuar valë të larta dhe më pas përfshirjen e tij nga flakët. Sulmi vjen vetëm një javë pasi NBC raportoi për goditjen e 20-të të këtij lloji gjatë administratës së dytë të Trump.
Operacionet e mëparshme janë kryer si në Karaibe, ashtu edhe në Paqësorin Lindor dhe, sipas zyrtarëve të Pentagonit, kanë shkaktuar mbi 75 viktima. Njoftimi i së dielës përkoi me mbërritjen e aeroplanmbajtëses USS Gerald R. Ford në rajonin e Karaibeve.
Këto veprime kanë shkaktuar debat të gjerë në Kongres, ku si demokratët ashtu edhe disa republikanë kritikojnë administratën se po anashkalon autoritetin e ligjvënësve. Kundërshtarët e shohin këtë si ndërhyrje të tepruar dhe jashtë kontrollit të pushtetit të Kongresit.
Në tetor, Senati rrëzoi një rezolutë që kërkonte që Presidenti Donald Trump të merrte miratimin e Kongresit për sulmet ushtarake në Karaibe. Një rezolutë tjetër, që kërkonte autorizim kongresional për çdo veprim ushtarak ndaj Venezuelës, u refuzua po ashtu këtë muaj.
Senatoret republikane Lisa Murkowski dhe Rand Paul bashkuan votat me demokratët për të kërkuar kontroll më të rreptë mbi përdorimin e forcës ushtarake. Rand Paul paralajmëroi se sulmet “bien ndesh me traditën amerikane” dhe shprehu shqetësimin se persona të pafajshëm mund të jenë vrarë pa prova të qarta.
Gjatë udhëtimit me Air Force One, Presidenti Trump deklaroi se SHBA “mund të zhvillojë disa bisedime me Maduro-n,” duke shtuar se “ata duan të flasin,” por pa dhënë detaje të tjera për mundësinë e dialogut.
Ndërkohë, Sekretari i Shtetit Marco Rubio njoftoi se Departamenti i Shtetit do të shpallë Kartelin De los Soles, të cilin SHBA e lidh me Presidentin venezuelian Nicolás Maduro, si organizatë të huaj terroriste. Masa hyn në fuqi më 24 nëntor.
Klasifikimi e vendos kartelin në të njëjtën kategori me Hamasin dhe Shtetin Islamik, duke bllokuar hyrjen e anëtarëve të tij në SHBA, duke mundësuar sekuestrimin e aseteve dhe duke e bërë të paligjshëm çdo suport material ndaj tij.
