Një juri federale në Kaliforni vendosi se Apple ka shkelur patentën e Masimo për teknologjinë e matjes së oksigjenit në gjak, duke e detyruar kompaninë të paguajë 634 milionë dollarë dëmshpërblim.
Një juri federale në Kaliforni ka vendosur që Apple duhet të paguajë 634 milionë dollarë kompanisë së pajisjeve mjekësore Masimo, pasi ka rezultuar se Apple Watch ka përdorur teknologji të mbrojtur me patentë pa autorizim. Sipas Reuters, shkelja lidhet me mënyrën e funksionimit të modalitetit të stërvitjes dhe njoftimeve të ritmit të zemrës në orët inteligjente të Apple.
Masimo e konsideroi këtë vendimmarrje si një fitore të rëndësishme në mbrojtjen e inovacioneve të saj, duke theksuar se pronësia intelektuale është thelbësore për zhvillimin e teknologjive që përdoren nga pacientët. Ndërkohë, Apple njoftoi se do ta apelojë vendimin, duke theksuar se patenta në fjalë ka skaduar në vitin 2022 dhe lidhet me pajisje të vjetra mjekësore.
Përplasja mes dy kompanive ka në qendër teknologjinë e pulsoksimetrisë, e cila përdor sensorë optikë për të monitoruar qarkullimin e gjakut. Masimo ka akuzuar Apple se ka rekrutuar punonjës të saj, përfshirë shefin e mjekësisë, për të përdorur teknologjinë e kompanisë në zhvillimin e Apple Watch.
Në vitin 2023, Komisioni Amerikan i Tregtisë vendosi në krah të Masimo-s, duke ndaluar importin e modeleve të Apple Watch që përmbanin matësin e oksigjenit në gjak. Për këtë arsye, modelet më të fundit të orëve të Apple nuk kanë pasur funksionin e matjes së oksigjenit.
Në gusht të këtij viti, Apple njoftoi një version të ri të funksionit, ku matjet kryhen përmes iPhone-it të përdoruesit dhe jo më nga sensori i orës, për të shmangur bllokimin e importit. Masimo aktualisht ka paditur Shërbimin Doganor të SHBA-së, duke kundërshtuar lejimin e këtyre orëve të reja në treg, ndërsa Apple kërkon që gjykata të rrëzojë ndalimin e importit.
Nga ana tjetër, Apple ka paditur Masimo-n dhe ka fituar vetëm një kompensim simbolik prej 250 dollarësh, pasi një juri e mëparshme vendosi se Masimo kishte shkelur një patentë të dizajnit të Apple.
Konflikti mes dy kompanive pritet të vazhdojë, ndërsa çështja mbetet një nga betejat më të mëdha ligjore në industrinë e pajisjeve teknologjike dhe mjekësore.
