Agjentët federalë nisën arrestimet në Charlotte, ndërsa autoritetet lokale u kërkuan banorëve qetësi, mes shqetësimeve për operacionin “Charlotte’s Web” dhe pranisë së shtuar të patrullave kufitare në qytet.
Arrestimet e para nga agjentët federalë nisën të shtunën në Charlotte, pas dislokimit të Patrullës Kufitare nga Departamenti i Sigurisë Kombëtare të SHBA-ve. Sipas DHS, operacioni synon të largojë nga komuniteti personat që konsiderohen kërcënim për sigurinë publike, ndërsa autoritetet lokale paralajmëruan se policia e qytetit nuk merr pjesë në zbatimin e ligjeve të emigracionit.
Shefi i Sherifatit të Mecklenburg County, Garry McFadden, konfirmoi se kishte marrë informacion paraprak për nisjen e operacionit federal. DHS e ka quajtur aksionin “Charlotte’s Web” dhe pretendon se rreth 1,400 kërkesa ndalimi nga ICE nuk janë zbatuar në Karolinën e Veriut, për shkak të politikave “strehë”, që sipas tyre kanë lënë qindra persona të paautorizuar të lirë në rrugë.
Ndërkohë, organizatat e komunitetit raportuan prani të shtuar të agjentëve të ICE dhe CBP në disa zona të qytetit, që nga mëngjesi i së shtunës, përfshirë South Boulevard, Central Avenue dhe Sharon Amity. Në një pastiçeri latine në East Charlotte, pronari Manolo Betancur rrëfeu se agjentët hynë në parkingun e biznesit të tij, duke shkaktuar frikë tek punonjësit dhe klientët. Ai tha se shumë fëmijë “kanë humbur prindërit e tyre që në orët e para të ditës”.
Video të publikuara nga mediat lokale treguan agjentë federalë duke shoqëruar një burrë të lidhur me pranga në një qendër tregtare, ndërsa raste të tjera arrestimesh u raportuan në parkingje të ndryshme të qytetit. Në muajt e fundit, operacione të ngjashme në qytete si Chicago dhe Portland kanë shkaktuar hetime, protesta dhe vendime gjyqësore për ndalim arrestimesh pa urdhër.
Zyrtarët e Mecklenburg County paralajmëruan se operacionet e tilla krijojnë frikë të panevojshme, pasi shpesh janë arrestuar persona pa precedentë kriminalë, duke përshkallëzuar tensionet dhe protestat. Brenda pastiçerisë së Betancur, vullnetarët ndanin kartela me këshilla juridike në anglisht dhe spanjisht, ndërsa vetë pronari mbante pasaportën amerikane me vete nga frika se mos ngatërrohej për shkak të theksit dhe pamjes.
Komisionerja Susan Rodriguez-McDowell, e cila vizitoi biznesin për të treguar mbështetje, kritikoi operacionet, duke thënë se arrestimet “pa kriter dhe për efekt dytësor” kalojnë kufijtë e pranueshëm. Ndërsa fliste, Betancur shikonte vazhdimisht nga dritarja, i shqetësuar se mos kishte makina të padëshiruara në parking.
“A dua që fëmijët e mi të kthehen në shtëpi pas ndeshjes së futbollit dhe të gjejnë babanë e tyre aty. Por shumë fëmijë sot nuk do ta kenë këtë mundësi,” tha Betancur.
Ky zhvillim i fundit vjen mes tensioneve të vazhdueshme mbi politikat e emigracionit në SHBA, teksa komunitetet lokale kërkojnë qartësi, siguri dhe shmangie të përshkallëzimit të frikës.
