Prokurorët francezë kanë kërkuar një dënim maksimal prej 20 vitesh burg për Dominique Pelicot, i akuzuar për përdhunimin e gruas së tij, Gisèle Pelicot, në një rast të paprecedent që ka tronditur opinionin publik.
Sipas akuzave, për më shumë se një dekadë, Pelicot drogoi gruan e tij dhe organizoi përdhunime në grup nga të paktën 50 burra të rekrutuar online.
Pelicot, i cili ka pranuar fajësinë, pritet gjithashtu të përballet me trajtim mjekësor për 10 vite pas përfundimit të dënimit. Prokurorja Laure Chabaud e cilësoi dënimin maksimal si “njëkohësisht shumë dhe pak, duke pasur parasysh rëndësinë dhe përsëritjen e akteve mizore”.
Gjatë gjyqit, një psikiatër dëshmoi se Pelicot shfaq “devijime të shumta seksuale”. Sipas prokurores, sjelljet e tij synonin poshtërimin dhe nënshtrimin e gruas së tij, “personit që pretendonte se donte më shumë në botë”. Ajo kërkoi që Pelicot të rishqyrtohet përpara çdo lirimi të mundshëm, duke theksuar rrezikun që ai përfaqëson.
Një tjetër prokuror, Jean-François Mayet, nënvizoi se ky proces gjyqësor nuk është vetëm për një vendim fajësie ose pafajësie, por për të ndryshuar në mënyrë rrënjësore marrëdhëniet mes burrave dhe grave. Ai vlerësoi kurajën e Gisèle Pelicot, e cila, duke hequr dorë nga anonimati, ka nxitur një debat kombëtar mbi kulturën e përdhunimit dhe çështjet e konsentimit.
Postera me sloganin “20 vite për të gjithë” janë shfaqur në rrugët pranë gjykatës në Avignon, duke reflektuar zemërimin publik. Megjithatë, vetëm Dominique Pelicot përballet me një dënim kaq të rëndë, ndërsa për të tjerët janë kërkuar dënime më të lehta.
Një bashkëpunëtor i Pelicot, Jean-Pierre Marechal, i cili gjithashtu ka droguar dhe përdhunuar ish-bashkëshorten e tij sipas udhëzimeve të Pelicot, përballet me një dënim prej 17 vitesh. Për 19 të akuzuar të tjerë, prokurorët kanë kërkuar dënime prej 10 vitesh. Shumica e të akuzuarve mohojnë fajësinë, duke pretenduar se nuk ishin të vetëdijshëm që Gisèle Pelicot ishte e pavetëdijshme.
Kundërshtimi
Prokurorja Chabaud kundërshtoi këtë mbrojtje, duke deklaruar se në vitin 2024 nuk mund të pranohet më që mungesa e reagimit të interpretohet si konsentim. Ajo theksoi se gjendja lethargjike e viktimës nuk linte asnjë dyshim për mungesën e pëlqimit të saj.
Kryeministri Michel Barnier e ka quajtur këtë proces një pikë kthese në luftën kundër dhunës ndaj grave në Francë, duke shpallur një seri masash të reja për të luftuar këtë fenomen. Mes tyre është një projekt pilot që do t’u lejojë farmacive të shpërndajnë teste për drogëra që përdoren për të nënshtruar viktimat.
Në të njëjtën linjë, Ministrja e Barazisë Salima Saa njoftoi zgjerimin e një programi që lejon viktimat të raportojnë sulmet seksuale në spitale, duke e bërë më të lehtë denoncimin. Numri i spitaleve të përfshira do të rritet nga 236 në 377 deri në fund të vitit të ardhshëm.
Gjyqi, i cili ka tërhequr vëmendje të madhe mediatike, është në fazën përfundimtare, me avokatët e të pandehurve që pritet të bëjnë mbylljet e tyre gjatë javëve të ardhshme. Vendimi përfundimtar pritet më 20 dhjetor.
