Sali Berisha shpërthen në sallën e Kuvendit duke kërkuar nga Altin Dumani të lexojë pyetjet një e nga një, duke e kthyer seancën në një duel të hapur verbal.
Kreu i Partisë Demokratike, Sali Berisha, ka reaguar ashpër gjatë seancës në Kuvend, në momentin kur drejtuesi i SPAK-ut, Altin Dumani, po lexonte pyetjet për deputetët. Ish-kryeministri nuk e fshehu irritimin, duke e ndërprerë me kërkesën që pyetjet të lexoheshin të plota, një nga një, për t’u dhënë përgjigje të qarta.
“Lexoji të gjitha pyetjet, një nga një, të plota! Mos bëhet kështu. Lexohet pyetja e plotë dhe pastaj jepet përgjigja, jo ndryshe!”, tha Berisha me ton të lartë nga vendi i tij, duke shkaktuar tension në sallë.
Përplasja mes dy figurave shënon përballjen e parë të drejtpërdrejtë mes Berishës dhe kreut të SPAK. Kjo ndodh në një kohë kur ish-kryeministri ndodhet nën hetim nga Prokuroria e Posaçme dhe ka sulmuar publikisht këtë institucion në çdo dalje të tij mediatike.
Reagimi i Berishës u pa si një përpjekje për të vënë në siklet Dumanin dhe për të sfiduar mënyrën se si SPAK zhvillon komunikimin me Kuvendin. Megjithatë, kjo ndërhyrje u interpretua edhe si një sinjal politik për mbështetësit e tij, të cilët e konsiderojnë hetimin ndaj tij si të motivuar politikisht.
Në anën tjetër, Dumani ruajti qetësinë, duke vijuar procedurat pa hyrë në debat, ndërsa deputetët e pranishëm dëgjonin me vëmendje tensionin që po rritej në sallë. Ndërhyrja e Berishës u shoqërua me komente dhe duartrokitje nga disa mbështetës të opozitës.
Ky incident është vetëm një ndër episodet e shumta të përplasjes mes Berishës dhe SPAK-ut, përplasje që po thellohet çdo ditë, duke shënuar një përballje të ashpër mes politikës dhe drejtësisë në Shqipëri.
