Shtetet e Bashkuara dhe Kina kanë përfunduar marrëveshjen për shitjen e TikTok, me Trump dhe Xi që pritet ta nënshkruajnë zyrtarisht këtë javë në Kore.
Sekretari amerikan i Thesarit, Scott Bessent, konfirmoi të dielën se detajet përfundimtare të marrëveshjes për transferimin e TikTok në duart e investitorëve të rinj amerikanë janë finalizuar. “Arritëm një marrëveshje përfundimtare për TikTok,” deklaroi ai në emisionin Face the Nation të CBS, duke theksuar se marrëveshja u arrit në Madrid dhe do të zyrtarizohet nga Donald Trump dhe Xi Jinping gjatë takimit të tyre të së enjtes në Kore.
Bessent nuk dha hollësi mbi strukturën e marrëveshjes, por e përshkroi atë si pjesë të një kuadri më të gjerë bashkëpunimi ekonomik mes SHBA-së dhe Kinës, që synon të balancojë marrëdhëniet tregtare midis dy fuqive. Ai shtoi se ky transaksion do të jetë një hap i rëndësishëm drejt stabilizimit të klimës ekonomike globale.
Kjo marrëveshje vjen pas urdhrit ekzekutiv të nënshkruar nga Trump më 25 shtator, i cili hapi rrugën për një pronësi të re të TikTok me bazë në SHBA dhe me shumicë të kapitalit nga investitorë amerikanë. “Unë nuk jam pjesë e anës komerciale të marrëveshjes,” tha Bessent, “por isha përgjegjës për bindjen e palës kineze që të pranonte kushtet e reja, dhe kjo u arrit me sukses.”
Vlera e marrëveshjes vlerësohet në rreth 14 miliardë dollarë. Investitorët amerikanë dhe ndërkombëtarë do të zotërojnë rreth 65% të kompanisë, ndërsa ByteDance dhe aksionarët kinezë do të ruajnë më pak se 20%. Ndërkohë, kontrolli i algoritmit të aplikacionit do të kalojë tek bordi i ri, që do të ketë gjashtë nga shtatë anëtarë amerikanë.
Në mesin e emrave të përfolur për përfshirje në bordin e ri janë pronarët e mediave Rupert Murdoch dhe Larry Ellison, si dhe Barron Trump, i cili është propozuar nga ish-producenti i mediave sociale të presidentit, Jack Advent, si anëtar i mundshëm.
Trump ndodhet aktualisht në Malajzi, ku po merr pjesë në samitin e Shoqatës së Kombeve të Azisë Juglindore. Takimi i së enjtes me Xi Jinping pritet të përfshijë edhe diskutime mbi bilancin tregtar, importet bujqësore amerikane dhe krizën e fentanilit, që ka ndikuar në vendosjen e tarifave 20% ndaj importeve kineze.
Nëse marrëveshja për TikTok zyrtarizohet, ajo do të shënojë një nga zhvillimet më të rëndësishme ekonomike të vitit, me ndikim të drejtpërdrejtë në tregjet dixhitale dhe në marrëdhëniet strategjike SHBA–Kinë.
