VMRO-DPMNE shpall fitore të thellë në zgjedhjet lokale të Maqedonisë së Veriut, duke siguruar shumicën e komunave dhe dominim të qartë ndaj kundërshtarëve politikë.
Partia në pushtet VMRO-DPMNE doli fituese pas raundit të parë të zgjedhjeve lokale në Maqedoninë e Veriut, të mbajtura më 19 tetor. Sipas rezultateve paraprake, ajo ka siguruar drejtimin e 30 komunave nga gjithsej 80 dhe pret të zgjerojë këtë numër në rreth 20 të tjera në raundin e dytë.
Në Shkup, kandidati Orce Gjorgjievski ka marrë një epërsi të ndjeshme, duke i dhënë partisë një tjetër fitore simbolike në kryeqytet. “Premtuam fitore dhe ja ku është”, u shpreh i kënaqur lideri i VMRO-DPMNE-së dhe kryeministri aktual Hristijan Mickoski.
Mickoski nënvizoi se numri i votave të fituara këtë herë ka tejkaluar zgjedhjet e mëparshme parlamentare e lokale, duke e konsideruar rezultatin si një dëshmi të forcës së re politike të partisë. Ai gjithashtu e përjashtoi mundësinë e zgjedhjeve të parakohshme parlamentare, pavarësisht presionit të opozitës, duke theksuar se “politikat etnocentrike janë mposhtur përfundimisht”.
Opozita LSDM, ndonëse pësoi një tjetër humbje, e konsideroi rezultatin si një hap përpara në disa zona ku ka fituar më shumë vota. Partia theksoi se procesi zgjedhor është shoqëruar me “shkelje të shumta”, ndërsa paralajmëroi ankesa zyrtare në Komisionin Shtetëror të Zgjedhjeve.
Në këtë raund, LSDM ka arritur të fitojë në Kriva Pallankë, Bogdanc dhe Krivogashtan, ndërsa pritet të garojë në rundin e dytë në rreth njëzet komuna. “Rezultati tregon për konsolidimin e brendshëm të partisë. Ky proces ka nisur dhe do të vazhdojë,” deklaroi lideri i LSDM-së, Venko Filipçe, i cili refuzoi të japë dorëheqjen pas këtyre zgjedhjeve.
Në bllokun shqiptar, koalicioni VLEN doli fitues në disa komuna kyçe. Izet Mexhiti fitoi me diferencë të madhe në Çair, ndërsa Bilal Kasami siguroi një tjetër fitore në Tetovë. Ky rezultat u shoqërua me festime pranë monumentit të Skënderbeut në Çarshinë e Vjetër të Shkupit.
Për Mexhitin, kjo është hera e katërt që do të drejtojë një komunë, megjithëse duhet të lërë postin e ministrit aktual pas fitores. Ish-ministri Bujar Osmani e uroi publikisht kundërshtarin për rezultatin.
Koalicioni Aleanca Kombëtare për Integrim (AKI), i udhëhequr nga BDI, fitoi në Gostivar, Likovë, Çashkë dhe Plasnicë që në raundin e parë. Nënkryetari i BDI-së, Arbër Ademi, deklaroi se “AKI është fituese absolute me mbi 20 mijë vota epërsi”, duke shtuar se diferenca mund të zgjerohet pas përpunimit të plotë të votave.
Në aspektin organizativ, Komisioni Shtetëror i Zgjedhjeve raportoi një pjesëmarrje prej 46,48 për qind deri në orën 18:30. Kjo shifër është vetëm pak më e ulët se në zgjedhjet e mëparshme, kur kishte arritur 51,44 për qind.
Në listën zgjedhore figuruan 1.832.415 votues të regjistruar, ndërsa në garë për 81 poste të kryetarëve të komunave morën pjesë 309 kandidatë. Për vendet në këshillat komunalë konkurruan mbi 10.490 kandidatë nga 576 lista të ndryshme.
Një detaj i veçantë i këtyre zgjedhjeve është përfaqësimi i ulët i grave, vetëm 32 kandidate, ose 10,36% e totalit. Meshkujt përbëjnë 89,64% të garuesve, një tregues që ngre shqetësime për barazinë gjinore në politikën vendore.
Buxheti shtetëror i ndarë për këto zgjedhje kap shifrën e 9.760.000 eurove, ku rreth dy të tretat janë destinuar për mediat dhe fushatat reklamuese të paguara.
Sipas vëzhguesve vendas dhe ndërkombëtarë, dita e zgjedhjeve ka kaluar qetë, pa shkelje të mëdha, ndërsa pritshmëritë e qytetarëve mbeten për komuna më funksionale dhe shërbime më efikase.
Rundi i dytë i zgjedhjeve është planifikuar të mbahet më 2 nëntor, ku pritet të vendosen fatet e mbi 20 komunave të tjera të vendit.
Në përfundim, zgjedhjet lokale të këtij viti treguan një rishpërndarje të forcës politike në Maqedoninë e Veriut, me një VMRO-DPMNE që forcon dominimin, një LSDM që kërkon ringritje dhe një bllok shqiptar më të konsoliduar në disa zona strategjike.
