Pasi qytetarët kanë kaluar vite me përmbytje, bllokime rrugësh dhe mungesë reagimi, Bashkia Patos mban më në fund një mbledhje për “masat parandaluese” të sezonit të ftohtë.
Në Patos u zhvillua mbledhja e radhës e Komisionit të Mbrojtjes Civile me temë “Marrja e masave parandaluese dhe përgatitja për përballimin e emergjencave civile gjatë periudhës vjeshtë–dimër 2025–2026”. Por takimi, i mbushur me deklarata formale dhe fjali të përsëritura, la më shumë dyshime sesa shpresë.
Ndërsa përfaqësuesit e bashkisë folën për “gatishmëri” dhe “bashkëpunim ndërinstitucional”, realiteti në terren është krejt tjetër. Çdo vit, reshjet e para mjaftojnë për të përmbytur lagje të tëra, për të bllokuar rrugë dhe për të lënë familje pa energji.
Banorët e zonave periferike të Patosit, si Zharreza apo Dukasi, e njohin mirë këtë histori. Ata dëgjojnë çdo tetor të njëjtat fjalë boshe për “masa parandaluese”, ndërsa vaditjet e lumenjve, kanalet e pastrimit dhe rrugët rurale mbeten në gjendje skandaloze.
Në mbledhje u fol për forcimin e bashkëpunimit mes institucioneve dhe për planin e reagimit ndaj emergjencave. Por askush nuk përmendi pse këto plane nuk funksionuan më parë, pse pas çdo përmbytjeje bashkia reagon me vonesë dhe pse çdo dimër fillon me justifikime dhe jo me zgjidhje.
Në vend që të kishte një strategji të qartë për pastrimin e kanaleve kulluese dhe sigurimin e infrastrukturës, Bashkia Patos preferon të shfaqet në foto dhe të flasë për “përgatitje”. Ndërkohë, fshatrat përreth vazhdojnë të jenë nën rrezik, pa asnjë mbrojtje reale.
Mungesa e fondeve nuk mund të jetë justifikim, pasi fondet për emergjencat janë shpërndarë çdo vit. Pyetja që ngre komuniteti është e thjeshtë: ku kanë shkuar ato para dhe pse pas çdo sezoni të reshjeve, situata përkeqësohet?
Ekspertët lokalë të mjedisit kanë paralajmëruar se zonat përreth Patosit janë më të rrezikuarat në Fier për shkak të sistemit të amortizuar kullues dhe mungesës së ndërhyrjeve në kohë. Ata kërkojnë mbikëqyrje të rreptë të projekteve dhe transparencë në mënyrën se si menaxhohen fondet publike.
Në fund të ditës, takime të tilla janë bërë rutinë burokratike që nuk sjellin ndryshim. Për banorët e Patosit, fjalët nuk mjaftojnë më. Atyre u duhet një bashki që vepron përpara emergjencës, jo një bashki që kujtohet vetëm pasi uji hyn nëpër shtëpi.
