Pas vendimit të Këshillit Bashkiak për t’i dhënë Gjergji Velos titullin “Qytetar Nderi”, Partia Demokratike në Lushnjë u distancua publikisht, duke e cilësuar vendimin politik dhe të njëanshëm.
Në kuadër të 81-vjetorit të Çlirimit të qytetit të Lushnjës, në një ceremoni të zhvilluar në ambientet e Muzeut Historik, Këshilli Bashkiak vendosi t’i akordojë titullin “Qytetar Nderi” Gjergji Velos, ish-drejtues në periudhën e sistemit komunist dhe një figurë që, sipas autoriteteve lokale, ka kontribuar në zhvillimin institucional të qytetit.
Por ky vendim ka sjellë menjëherë reagime të forta nga opozita lokale. Kryetari i grupit të këshilltarëve të Partisë Demokratike në Këshillin Bashkiak të Lushnjës, Klement Çela, deklaroi se demokratët nuk kanë qenë pjesë e këtij vendimi dhe se distancohen plotësisht nga ai. Në postimin e tij publik, Çela theksoi se vendimi është miratuar vetëm me votat e mazhorancës socialiste.
Gazetari i TV Apollon, Ndriçim Gjoshi, zhvilloi një bisedë telefonike me Çelën, i cili e konsideroi aktin si “një vendim politik të njëanshëm, pa konsensus dhe pa përfaqësim të plotë të këshillit”. Sipas tij, për figura që lidhen me të kaluarën komuniste, duhet një proces më i hapur dhe një konsultim me qytetarët përpara marrjes së çdo vendimi institucional.
Çela shtoi se vlerësimet e këtij lloji nuk mund të jenë rezultat i shumicës politike, por kërkojnë transparencë dhe ndjeshmëri historike. Ai e cilësoi titullin e dhënë si një “akt simbolik që nuk reflekton vlerat e përbashkëta të qytetit”.
Reagimi i Partisë Demokratike është pjesë e një debati më të gjerë që ka përfshirë opinionin publik në Lushnjë dhe më gjerë, mbi mënyrën se si duhet trajtuar trashëgimia e figurave të lidhura me periudhën e regjimit komunist. Kjo çështje vijon të ngjallë diskutime të forta për raportin mes kujtesës historike dhe vlerësimit institucional.
