Një akt i thjeshtë dhurimi u shndërrua në një takim kulturor ku fjala, kujtesa dhe libri u bënë ura lidhëse mes autorit dhe lexuesve lushnjarë.
Në Bibliotekën e Lushnjës, studiuesi dhe autori Hysen Koçillari zhvilloi një takim të ngrohtë me lexuesit e qytetit, gjatë një ceremonie ku dhuroi disa prej librave të tij. Iniciativa, e thjeshtë në dukje, solli një frymë bashkëbisedimi mbi trashëgiminë kulturore, historinë dhe pasionin për librin.
Miqtë dhe dashamirësit e Koçillarit, sapo morën vesh për vizitën e tij nga Tirana, u mblodhën në bibliotekë për ta pritur. Takimi u kthye në një bisedë të sinqertë, ku u ndanë kujtime, reflektime dhe rrëfime për identitetin kulturor të Devollit, krahinës nga e ka origjinën autori.
Që prej vitit 2000, Koçillari ka botuar katër libra të rëndësishëm që trajtojnë historinë, traditat dhe zhvillimet e kësaj treve: “Trashëgimia shpirtërore e Devollit”, “Devolli, rrënjë dhe zhvillime historike”, “Devollinjtë, demografia dhe vendbanimet e tyre” dhe “Këngët historike në folklorin e Devollit”. Secili prej tyre përfaqëson një pasqyrë të gjerë të kujtesës kolektive dhe kulturës popullore devollite.
Në fjalën e tij, autori theksoi se qëllimi i këtyre botimeve është të ruhet identiteti kulturor dhe të përcillet te brezat e rinj dashuria për origjinën. Ai shtoi se pa kujtesë historike, një popull rrezikon të humbasë rrënjët dhe të shkojë drejt një harrese të rrezikshme.
Gjatë bashkëbisedimit, pjesëmarrësit ndanë vlerësime për stilin e punës së studiuesit, për përkushtimin në kërkimet historike dhe për mënyrën se si arrin të ndërthurë faktet me emocionin njerëzor. Sipas tyre, veprat e Koçillarit përbëjnë një kontribut të çmuar në arkivin e kulturës shqiptare.
Në përfundim, autori njoftoi se ka në përgatitje dy libra të rinj, që do të zgjerojnë më tej studimin mbi Devollin dhe rolin e tij në historinë kombëtare. Lexuesit e Lushnjës e përcollën me duartrokitje dhe me ndjesinë se takimet e tilla e mbajnë gjallë shpirtin e kulturës dhe dashurinë për librin.
