Derbi Lushnja–Apolonia pritet të jetë një nga sfidat më të ndezura të fazës së ardhshme të Kupës, duke rikthyer rivalitetin historik të Myzeqesë në një betejë që premton emocione të forta.
Skuadra e Apolonisë siguroi një kualifikim të pastër në Kupën e Shqipërisë, pasi mposhti Besëlidhjen me rezultatin e thellë 3-0 në stadiumin “Loni Papuçiu”.
Në përballjen e vlefshme për fazën e 1/32-ve të Kupës, fierakët dhanë një paraqitje bindëse si në lojë, ashtu edhe në rezultat. Që në minutat e para, Apolonia e mori kontrollin e plotë të ndeshjes dhe shënoi herët, duke mos i lënë asnjë hapësirë kundërshtarit.
Ylli i takimit ishte Mmesoma Anthony Umejiego, i cili u shndërrua në protagonist absolut me tre gola të shënuar në minutat 5, 11 dhe 66. Tripleta e tij i dha Apolonisë një fitore të merituar dhe një biletë të sigurt për raundin e radhës të Kupës së Shqipërisë.
Skuadra vendase dominoi në çdo repart, me mesfushën që kontrollonte ritmin dhe sulmin që konkretizonte çdo rast të krijuar. Lojtarët e Apolonisë treguan qartësi taktike dhe efikasitet para portës, duke e bërë diferencën që në fraksionin e parë të lojës.
Në anën tjetër, Besëlidhja nuk arriti të reagonte, pavarësisht përpjekjeve sporadike për të ngushtuar rezultatin. Mbrojtja fierake qëndroi e vendosur, duke mos lejuar asnjë rrezik serioz drejt portës së saj.
Kjo fitore e çon Apoloninë në fazën e dytë të Kupës, ku do të përballet me Lushnjën.
Trajneri dhe tifozët e Apolonisë e kanë cilësuar këtë ndeshje si një sinjal të qartë se ekipi është në rrugën e duhur dhe gati për sfidat më të forta që e presin në vazhdim të sezonit.
Skuadra e Lushnjës fitoi ndaj Butrintit me rezultatin 2-1 në Kupën e Shqipërisë dhe siguroi përballjen e zjarrtë me Apoloninë në raundin e dytë të garës.
Në ndeshjen e zhvilluar në fushën sportive të Plugut, verdhejeshilët e Ditmar Bicajt siguruan kualifikimin falë një loje të fortë dhe zëvendësimeve vendimtare në pjesën e dytë. Trajneri Bicaj eksperimentoi me formacionin, por u detyrua të aktivizojë titullarët për të shmangur një surprizë të mundshme ndaj skuadrës sarandjote.
Pjesa e parë u mbyll pa gola, pavarësisht dominimit të Lushnjës, që ushtronte presion të vazhdueshëm në zonën kundërshtare. Butrinti mbajti linjat mbyllur dhe mbrojti me disiplinë, duke e bërë të vështirë depërtimin e vendasve.
Në fraksionin e dytë, ndryshimet e bëra nga stoli sollën fryte. Në minutën e 68-të, Ribaudo shënoi një gol të bukur nga goditja e dënimit, duke kaluar Lushnjën në avantazh. Vetëm dhjetë minuta më vonë, kapiteni Canka realizoi të dytin pas një kombinimi të shkëlqyer me Ololën, duke vulosur fatin e sfidës.
Butrinti reagoi vonë, në minutën e 88-të, me Diop që ngushtoi shifrat në 2-1, por pa mundur të ndryshojë rezultatin. Lushnja administroi me qetësi minutat e mbetura dhe mori një fitore të merituar që e çon në fazën e ardhshme të Kupës së Shqipërisë, ku do të përballet me Apoloninë në një derbi të shumëpritur myzeqar.
Pas ndeshjes, trajneri Bicaj e vlerësoi fitoren, por u shpreh kritik ndaj disa lojtarëve. “Ishte një takim më i vështirë sesa dukej në letër. Duhet të përmirësohemi shumë, sepse rotacioni nuk dha rezultatet e pritura,” deklaroi ai, duke shtuar se ekipi do të kërkojë vazhdimësi edhe në kampionat.
Nga ana tjetër, trajneri i Butrintit, Artan Meçani, e pa ndeshjen si një test pozitiv për ekipin e tij. Ai theksoi se sfida shërbeu për të parë gjendjen e lojtarëve pas pushimit dhe për të përgatitur skuadrën për javët e ardhshme të kampionatit.
