Guvernatori Gent Sejko deklaroi se anëtarësimi i Shqipërisë në SEPA do të ulë kostot bankare, do të përshpejtojë transfertat dhe do të rrisë sigurinë e pagesave ndërkombëtare.
Integrimi i Shqipërisë në sistemin evropian të pagesave SEPA shënon një hap historik drejt modernizimit financiar dhe afrimit me Bashkimin Europian. Guvernatori i Bankës së Shqipërisë, Gent Sejko, në ceremoninë e transaksionit të parë SEPA, theksoi se ky zhvillim do të ulë ndjeshëm tarifat e transfertave dhe do të përmirësojë cilësinë e shërbimeve bankare.
Sipas tij, hyrja në SEPA pritet të gjenerojë rreth 20 milionë euro kursime vetëm në vitin e parë të zbatimit. Sejko kujtoi edhe përvojën pozitive me sistemin AIPS Euro, i cili që nga janari 2022 i ka kursyer tregut vendas rreth 140 milionë euro, duke vërtetuar ndikimin pozitiv të modernizimit financiar.
Guvernatori sqaroi se transfertat ndërmjet Shqipërisë dhe vendeve të SEPA-s do të jenë deri në pesë herë më të lira se më parë, ndërsa pagesat elektronike do të realizohen më shpejt, me transparencë të plotë dhe me standarde të barabarta me ato evropiane. “Një pagesë nga Tirana në Romë do të kushtojë sa një transfertë brenda Tiranës,” nënvizoi Sejko.
Përfitimet, sipas tij, shtrihen përtej aspektit ekonomik. Integrimi në SEPA do të ndihmojë në uljen e informalitetit, rritjen e përfshirjes financiare dhe lehtësimin e dërgesave nga emigrantët shqiptarë, të cilët do të kursejnë miliona euro çdo vit. Gjithashtu, kostot e transfertave midis bizneseve të Ballkanit Perëndimor do të bien ndjeshëm, duke u përafruar me nivelet e Bashkimit Europian.
Sejko theksoi se SEPA nuk është thjesht një projekt teknik, por një nxitës i besueshmërisë për investitorët dhe i konkurrencës në tregun financiar shqiptar. Ai theksoi se përfshirja në këtë sistem do të përgatisë vendin për integrime të tjera financiare brenda BE-së, duke e bërë infrastrukturën bankare më fleksibël dhe të përshtatshme për inovacionet e ardhshme.
Guvernatori shtoi se efektet për qytetarët dhe bizneset janë të qarta: tarifa më të ulëta, shërbime më të shpejta dhe siguri më e madhe në çdo transaksion. Ai ftoi bankat dhe institucionet financiare të promovojnë shërbimet SEPA dhe të edukojnë publikun mbi përfitimet e këtij integrimi historik.
Në përmbyllje, Sejko theksoi se arritja e këtij standardi është rezultat i përkushtimit dhe partneritetit të gjatë ndërinstitucional. “Tani është momenti të shfrytëzojmë plotësisht këtë mundësi për të forcuar pozicionin e Shqipërisë në tregjet financiare evropiane,” deklaroi ai.
