Prej më shumë se 20 vitesh, 60 familje dhe mbi 20 biznese të një pallati në lagjen “Apollonia” të Fierit presin ende certifikatën e pronësisë, ndërsa institucionet heshtin përballë një padrejtësie të gjatë.
Banorët e pallatit 12-katësh janë rikthyer sërish sot në protestë para zyrave të Kadastrës së Fierit. Ata kërkojnë që pas më shumë se dy dekadash pritjeje, shteti t’u njohë të drejtën ligjore mbi banesat dhe bizneset ku jetojnë e punojnë prej vitesh. Sipas tyre, asnjë pengesë ligjore nuk ekziston për lëshimin e certifikatave të pronësisë.
Një prej përfaqësuesve të banorëve deklaroi se objekti nuk ka plan mbivendosjeje dhe se të gjitha dokumentet teknike janë në rregull. Ata e cilësojnë të pajustifikuar vonesën institucionale, duke theksuar se problemet burokratike po u mohojnë të drejtën themelore të pronës.
Në anën tjetër, ndërtuesi i pallatit, Njazi Vrenozi, tha se nga nëntë pallatet që ka ngritur në Fier, vetëm ky objekt mbetet pa zgjidhje. Ai sqaroi se çështja ka lindur nga një mospërputhje në metrat e deklaruara nga ish-pronarët, por kjo është zgjidhur tashmë përfundimisht.
Sipas Vrenozit, pengesat kanë ardhur për shkak të ndërrimeve të shpeshta të drejtuesve të Kadastrës së Fierit. “Sa herë që ndryshon drejtuesi, dosja rikthehet në pikën zero. Banorët nuk kanë asnjë faj për vonesat,” tha ai, duke theksuar nevojën për stabilitet institucional.
Banorët, të lodhur nga premtimet e përsëritura, kërkojnë ndërhyrjen e institucioneve qendrore. Ata theksojnë se kanë paguar çdo detyrim ndaj ndërtuesit dhe shtetit, ndaj është e papranueshme që ende nuk figurojnë si pronarë ligjorë.
Drejtori aktual i Kadastrës së Fierit, Evarist Kazheli, në një reagim për mediat, premtoi se dosja do të trajtohet me prioritet. Ai deklaroi se po verifikohen dokumentet dhe se institucioni synon ta mbyllë këtë proces brenda një kohe të arsyeshme.
Ndërsa banorët shpresojnë që premtimi të mos mbetet një tjetër justifikim, situata e tyre mbetet shembull i qartë i kaosit burokratik që pengon qytetarët të gëzojnë të drejtën e pronësisë në vendin e tyre.
