Një ngjarje e rëndë tronditi Greqinë mbrëmjen e djeshme, ku në një kamping në Finikunda u ekzekutuan pronari grek dhe një punonjës shqiptar, pasi autori i paidentifikuar i qëlloi nga afër dhe u largua.
Tragjedia ndodhi rreth orës 20:30 në një kamping turistik në zonën e Finikundës, në Mesinia. Sipas raportimeve të mediave greke, viktimat janë një shtetas grek rreth 70 vjeç, pronar i kampingut, dhe një shqiptar rreth 55 vjeç që punonte aty prej vitesh.
Autori, ende i paidentifikuar, hyri në ambientet e recepsionit ku ndodhej pronari dhe e qëlloi disa herë me armë zjarri, duke e lënë të vdekur në vend. Pak metra më tej, shqiptari tentoi të largohej për të shpëtuar, por u qëllua pas shpine dhe humbi jetën në vend.
Banorët e zonës, të tronditur nga krismat, njoftuan menjëherë policinë. Forcat e rendit mbërritën në vendngjarje, ku nisën hetimet dhe bllokuan perimetrin përreth. Sipas dëshmive të para, autori është një person i ri, i cili u pa duke u larguar me nxitim pas krimit.
Mediat lokale raportojnë se pronari grek kishte pasur konflikte të vogla më herët dhe madje ishte kërcënuar, por ai u kishte thënë miqve se nuk kishte armiq dhe nuk ndjente rrezik. Kjo ka ngritur dyshime se vrasja mund të ketë qenë e planifikuar.
Autoritetet greke po hetojnë motivet e mundshme të krimit, ndërsa pista e parë përfshin një konflikt personal apo ekonomik. Një grup hetimor i specializuar ka marrë në dorë çështjen dhe po kërkon çdo provë që mund të çojë në identifikimin e autorit.
Ngjarja ka tronditur komunitetin vendas dhe ka rikthyer debatin për sigurinë në zonat turistike të Greqisë, sidomos gjatë sezonit të verës, kur kampingjet dhe resortet janë plot me punëtorë vendas e të huaj.
