Në Fier u festua Dita Botërore e të Moshuarve me aktivitete kulturore dhe mesazhe respekti, duke theksuar rëndësinë e kujdesit dhe vlerësimit të kësaj moshe.
Më 1 tetor, bota kujton dhe nderon të moshuarit, një ditë e shpallur nga Asambleja e Përgjithshme e Kombeve të Bashkuara në vitin 1990. Edhe në Shqipëri kjo ditë kujtohet çdo vit, duke përcjellë mesazhin e solidaritetit dhe respektit për brezat që kanë dhënë kontributin e tyre në shoqëri.
Në Shtëpinë e të Moshuarve në Fier, atmosfera ishte festive. Banorët e këtij institucioni morën pjesë në një aktivitet të posaçëm, ku kujdesi dhe dashuria për ta u kthyen në qendër të vëmendjes.
Drejtoresha e këtij institucioni, Dorina Gjini, përshëndeti të pranishmit dhe theksoi rëndësinë e kësaj dite, duke vënë në pah se kujdesi për të moshuarit duhet të jetë një angazhim i përhershëm, jo vetëm një detyrim institucional.
Bashkia Fier organizoi gjithashtu një aktivitet të veçantë, duke sjellë gëzim dhe emocion për të moshuarit. Një koncert i larmishëm dhe vallëzime nga grupi “Myzeqeja” u shoqëruan me performanca të nxënësve të shkollave të qytetit.
Këto momente i dhanë ngjyrë ditës, duke i bërë të moshuarit të ndihen të respektuar e të vlerësuar. Aktiviteti u shndërrua në një mesazh të qartë: kujdesi ndaj të moshuarve është pjesë e kulturës sonë dhe një detyrë e përbashkët e shoqërisë.
Nëpërmjet këtyre festimeve, Fieri u bë shembull se si komuniteti mund të bashkohet për të sjellë buzëqeshje tek njerëzit që e kanë ndërtuar këtë shoqëri me punën dhe përkushtimin e tyre.
