Pas humbjes në shtëpi me Egnatian, drejtuesit e Flamurtarit pritet të marrin një vendim të rëndësishëm për të ardhmen e trajnerit Karlos Garsia.
Situata tek Flamurtari është tensionuar ndjeshëm pas dështimit të fundit përballë Egnatias, duke e zhytur skuadrën në fund të tabelës. Burime pranë klubit kanë bërë të ditur se drejtuesit janë thellësisht të zhgënjyer, jo vetëm nga rezultati, por edhe nga humbja e plotë e objektivave madhorë që ishin vendosur në fillim të sezonit.
Trajneri spanjoll Karlos Garsia është në qendër të kritikave dhe përballë një presioni të madh. Sipas informacioneve, nuk përjashtohet mundësia që ai të japë dorëheqjen, ndërkohë që në tavolinë mbetet edhe opsioni i shkarkimit nga drejtuesit. Ky vendim pritet të merret gjatë ditës së sotme.
Ecuria e skuadrës në javët e fundit ka sjellë humbje të vazhdueshme, duke i zhgënjyer tifozët dhe duke dobësuar besimin tek stafi teknik. Për një klub me historinë dhe ambiciet e Flamurtarit, ky pozicion i fundit në renditje është i papranueshëm.
Ndërkohë, opinionet e brendshme në klub janë ndarë: disa mendojnë se Garsia duhet të largohet menjëherë, ndërsa të tjerë shpresojnë ende për një rikthim tek rezultatet e mira, nëse do t’i jepet një shans i fundit. Megjithatë, realiteti i klasifikimit dhe presioni i madh i publikut e bëjnë gjithnjë e më të vështirë qëndrimin e tij.
Të gjitha sinjalet tregojnë se trajneri i Flamurtarit e ka të ardhmen të pasigurt dhe se ora e tij në pankinën vlonjate është drejt fundit.
Në rast se Garsia largohet, pritet që drejtuesit të lëvizin shpejt për të gjetur pasuesin, me qëllim që skuadra të mos humbasë më shumë terren në kampionat.
