Partia Demokratike kërkon debat të posaçëm në Parlament për prioritetet e qeverisë Rama 4, pas bllokimit të prezantimit të programit qeverisës më 18 shtator.
Kryetari i grupit parlamentar të Partisë Demokratike, Gazment Bardhi, ka bërë publike kërkesën për zhvillimin e një mocioni me debat në Kuvend. Sipas tij, Shqipëria ndodhet në një fazë të rëndësishme të rrugëtimit europian dhe transparenca e qeverisë është domosdoshmëri.
Në letrën drejtuar kryetarit të Kuvendit, Niko Peleshi, Bardhi thekson se Kuvendi duhet të diskutojë hapur mbi programin e ri politik të mazhorancës dhe mbi bilancin e saj gjatë mandatit të kaluar. Ai thekson se deputetët kanë detyrimin të shqyrtojnë qartë prioritetet që prekin zhvillimin ekonomik dhe procesin e integrimit.
Një nga pikat e ngritura në dokument është edhe integriteti i ministrave të qeverisë. Bardhi shprehet se prania e dyshimeve mbi lidhje të mundshme me krimin e organizuar dëmton besimin e qytetarëve dhe komprometon marrëdhëniet me partnerët ndërkombëtarë.
Ai paralajmëron se qytetarët shqiptarë presin figura politike pa rekorde kriminale dhe me standarde të larta etike. Në të kundërt, sipas tij, krijohet një regres i rrezikshëm për proceset demokratike dhe për imazhin e Shqipërisë në arenën ndërkombëtare.
Kreu i grupit parlamentar të PD-së argumenton se vetëm një debat i hapur në Kuvend do të garantojë transparencën mbi axhendën qeverisëse dhe do t’i japë legjitimitet politik vendimeve të ardhshme.
Duke iu referuar nenit 98 të Rregullores së Kuvendit, Bardhi nënvizon se mocioni është kërkesë e ligjshme dhe e domosdoshme për të mbrojtur interesin publik dhe rrugëtimin europian të vendit.
