Donald Trump emëron ish-kryeministrin britanik Tony Blair për të udhëhequr administratën e përkohshme të Gazës pas luftës, mes negociatave të tensionuara me palët rajonale.
Presidenti amerikan Donald Trump ka bërë një lëvizje të bujshme duke zgjedhur ish-kryeministrin britanik Tony Blair për të marrë drejtimin e administratës së përkohshme në Rripin e Gazës. Ky vendim, sipas mediave izraelite, shihet si përpjekje për të sjellë stabilitet pas përfundimit të luftës.
Trump i ka dhënë autorizim Blair-it që të bashkojë palët rajonale dhe ndërkombëtare rreth një organi kalimtar, i cili do të qeverisë Gazën në periudhën pas konfliktit. Deri tani nuk ka detaje të qarta për përbërjen e kabinetit apo përgjegjësitë e tij konkrete.
Vendimi vjen vetëm pak orë pas deklaratës së Trump në një takim me presidentin turk Rexhep Tayip Erdogan, ku ai tha se SHBA është shumë pranë arritjes së një marrëveshjeje mes Hamasit dhe Izraelit. Ai theksoi se takimet me Katarin, Arabinë Saudite, Emiratet e Bashkuara Arabe dhe Jordaninë kanë krijuar bazat për një plan të mundshëm.
I dërguari amerikan Steve Witkoff ka konfirmuar se Trump ka paraqitur një “plan 21-pikësh” për paqen në Lindjen e Mesme, i cili synon kthimin e pengjeve, forcimin e marrëdhënieve me vendet arabe dhe mobilizimin e fondeve për rindërtimin e infrastrukturës së shkatërruar të Gazës.
Administrata Trump shpreson që ky plan do të nxisë shtetet arabe të kontribuojnë financiarisht për ringritjen e rajonit dhe për krijimin e kushteve për stabilitet afatgjatë. Takimi i radhës mes Trump dhe kryeministrit izraelit Benjamin Netanyahu në Uashington pritet të jetë vendimtar për të diskutuar detajet e planit.
Ndërkohë, burime diplomatike izraelite kanë bërë të ditur se administrata amerikane ka paralajmëruar Izraelin kundër çdo përpjekjeje për aneksimin e Bregut Perëndimor, duke e konsideruar këtë një pengesë serioze për arritjen e një marrëveshjeje të pranueshme nga komuniteti ndërkombëtar.
Ky zhvillim e vendos Blair-in në një pozicion kyç për të testuar mundësitë e një zgjidhjeje të qëndrueshme, ndërsa bota ndjek me vëmendje nëse ky plan i ri i Trump do të sjellë realisht paqe apo thjesht një armëpushim të përkohshëm.
