Ekspozita “Magjia e ngjyrave” e piktorit Kastriot Boriçi vijon të tërheqë vizitorë në Divjakë, duke sjellë peizazhet dhe shpirtin e Myzeqesë.
Në sallën e Qendrës Kulturore të Divjakës, ekspozita “Magjia e ngjyrave” ka hapur dyert për artdashësit, duke ofruar një udhëtim përmes penelit të mjeshtrit myzeqar Kastriot Boriçi. Qytetarë të moshave të ndryshme janë ndalur për të përjetuar emocionin që sjell arti i tij.
Mes vizitorëve ishte edhe intelektuali i njohur dhe mësuesi në pension, Tristan Lala, i cili shprehu vlerësim të veçantë për punimet e ekspozuara. Në një prononcim për TV Apollon, ai theksoi se Boriçi arrin të ringjallë me ngjyra natyrën dhe karakterin e tokës së Myzeqesë.
“Ky është një kontribut i madh për kulturën tonë lokale. U bëj thirrje qytetarëve, intelektualëve dhe nxënësve të mos e humbin këtë mundësi, sepse këtu reflektohet bukuria dhe identiteti ynë,” u shpreh Lala.
Punimet e Boriçit, të mbushura me peizazhe dhe atmosferë myzeqare, po shihen si një urë mes traditës dhe brezave të rinj, duke i dhënë qytetit frymëmarrje artistike. Ekspozita po shihet jo vetëm si një ngjarje kulturore, por edhe si një akt përforcimi i identitetit lokal.
Organizatorët kanë bërë të ditur se ekspozita do të vijojë të jetë e hapur edhe në ditët e ardhshme, duke i dhënë mundësi publikut të gjerë të shijojë artin e sjellë në telajo me përkushtim dhe pasion.
Në Divjakë, kjo ngjarje kulturore po përjetohet si një festë e ngjyrave dhe kujtimeve, që ruan dhe rikthen vlerat e një zone me histori e shpirt të pasur.
Nga: Ndriçim Gjoshi
