Prokuroria e Fierit çon për gjykim ndërtuesin, kryeinspektorin dhe ekspertin, pasi ndërtuan 77% më shumë se leja e miratuar në Lushnjë.
Një rast flagrant abuzimi me ndërtimet ka dalë në pah në qytetin e Lushnjës, ku Prokuroria e Fierit ka përfunduar hetimet dhe ka dërguar për gjykim tre persona të akuzuar për shkelje të rënda ligjore.
Hetimi lidhet me një objekt në lagjen “Kongresi”, ku investitori N.Q. kishte marrë leje ndërtimi nga Bashkia Lushnjë. Megjithatë, gjatë zbatimit të projektit ai ndërtoi tej kushteve të miratuara, duke shtuar 276.6 m² më shumë, çka përbën një tejkalim prej plot 77%.
Prokuroria konfirmon se ky ndërtim i paligjshëm nuk do të ishte i mundur pa mbështetjen ose mospërfilljen e strukturave shtetërore që duhet të kontrollonin procesin. Pikërisht për këtë arsye, përveç investitorit, përpara gjykatës do të dalin edhe dy persona të tjerë.
Bëhet fjalë për Gj.M., ish-kryeinspektor i Inspektoriatit të Mbrojtjes së Territorit në Bashkinë Lushnjë, i cili sipas hetimeve nuk ushtroi detyrën e tij, duke lejuar ndërtimin të vijonte në kundërshtim me ligjin.
Në dosje është përfshirë edhe eksperti E.S., i cili akuzohet për ekspertim të rremë, pasi raportoi të dhëna të falsifikuara mbi sipërfaqen e objektit të ndërtuar. Prokuroria evidentoi se në dokumentet e tij sipërfaqja e ndërtimit paraqitej dukshëm më e vogël se ajo faktike.
Në bazë të provave të mbledhura, N.Q. do të gjykohet për “ndërtim të paligjshëm”, Gj.M. për “shpërdorim detyre”, ndërsa E.S. për “ekspertim të rremë”, vepra penale të parashikuara në Kodin Penal.
Ky rast, sipas organit të akuzës, nxjerr në pah jo vetëm shkeljet e investitorëve privatë, por edhe papërgjegjshmërinë e punonjësve shtetërorë, të cilët me veprime ose mosveprime dëmtojnë rendin ligjor.
Prokuroria e Fierit thekson se është e vendosur të çojë para drejtësisë çdo person që shkel ligjin në fushën e ndërtimit dhe çdo zyrtar publik që abuzon me detyrën duke lejuar paligjshmërinë.
