Ousmane Dembele u shpall lojtari më i mirë i botës për vitin 2025, duke fituar Topin e Artë dhe duke mposhtur konkurrencën e talentit të Barcelonës, Lamine Yamal.
Sulmuesi i Paris Saint-Germain siguroi trofeun më prestigjioz individual pas një sezoni të jashtëzakonshëm, ku dha kontribut vendimtar në sukseset historike të klubit francez. Dembele ishte figura kyçe në fitimin e tripletës, duke ndihmuar PSG-në të ngrejë për herë të parë trofeun e Champions League.
Ceremonia e çmimeve solli edhe vlerësime të tjera të rëndësishme. Trajneri i PSG-së, Luis Enrique, u shpall më i miri i vitit, duke u nderuar për arritjet e tij në stolin e klubit parizien.
Çmimi “Yashin” për portierin më të mirë shkoi për Gianluigi Donnarumma, i cili ishte vendimtar në shumë ndeshje të mëdha të sezonit. Ndërkohë, Viktor Gyökeres u nderua me trofeun “Gerd Muller” si sulmuesi më i mirë i vitit.
Talenti i Barcelonës, Lamine Yamal, edhe pse nuk fitoi Topin e Artë, mori trofeun “Kopa” si lojtari më i mirë nën 21-vjeç, duke dëshmuar se është një prej yjeve të së ardhmes në futbollin botëror.
Në fund, PSG u kurorëzua edhe si klubi më i mirë i vitit, duke përmbyllur një sezon që do të mbetet gjatë në historinë e futbollit evropian.
Lista e plotë e fituesve përfshinte: Dembele (Topi i Artë), Yamal (Trofeu “Kopa”), Donnarumma (Trofeu “Yashin”), Gyökeres (Trofeu “Gerd Muller”), Luis Enrique (Trofeu “Johan Cruyff”) dhe PSG si “Klubi i vitit”.
