Kryeministri Edi Rama theksoi se aksioni për lirimin e hapësirave publike nuk do të ndalet as ditët e pushimit, duke premtuar rikthimin e trotuareve dhe shesheve për qytetarët.
Aksioni i nisur nga Inspektorati Kombëtar i Mbrojtjes së Territorit për prishjen e ndërtimeve pa leje ka hyrë në një fazë të re, duke përfshirë si Tiranën ashtu edhe qytete të tjera të vendit. Qëllimi i operacionit është kthimi i hapësirave publike në shërbim të qytetarëve.
Kryeministri Edi Rama, përmes një videoje të publikuar në rrjetet sociale, tregoi pamje nga shembjet e objekteve që kishin pushtuar trotuaret dhe hapësirat e përbashkëta. Ai e shoqëroi videon me një mesazh të qartë: “Ecim pa të shtunë e pa të dielë”.
Në publikimin e tij, Rama nënvizoi se qeveria nuk do të tërhiqet përballë abuzuesve të territorit dhe se procesi i shembjeve do të vijojë çdo ditë, derisa qytetarët të marrin hapësirat e tyre të mohuara.
Pamjet e shpërndara në Facebook tregonin shembjen e disa bizneseve të ngritura mbi hapësira publike, ku sipas qeverisë, pronarët kishin përfituar në kurriz të interesit të përgjithshëm.
Ky operacion vjen pas një sërë aksionesh të ngjashme që po kryhen në gjithë vendin, ku autoritetet synojnë të krijojnë një standard të ri urban, larg ndërtimeve të paligjshme dhe zaptimit të trotuareve.
Pavarësisht kundërshtive që shpesh shoqërojnë këto prishje, qeveria deklaron se qytetarët do të jenë përfituesit kryesorë të këtij procesi, pasi hapësirat e rikthyera do të shërbejnë për lëvizjen e lirë, sigurinë dhe cilësinë e jetesës urbane.
Rama ka përsëritur se aksioni nuk njeh orar, festë apo fundjavë, dhe se vendosmëria e qeverisë është e plotë për të përfunduar këtë proces transformues të hapësirave publike në Shqipëri.
