Dhjetëra milionë britanikë morën një mesazh alarmi në telefon si pjesë të testit kombëtar për paralajmërime emergjente që synojnë të mbrojnë jetën e qytetarëve.
Dhjetëra milionë përdorues të telefonave celularë në Mbretërinë e Bashkuar u njoftuan të dielën pasdite përmes një mesazhi testues të sistemit mbarëkombëtar të alarmit publik. Testi, i dyti i këtij lloji, u zhvillua rreth orës 15:00 në rrjetet 4G dhe 5G, duke përfshirë një tekst sqarues se sistemi do të përdoret në raste emergjence që rrezikojnë jetën.
Qeveria britanike njoftoi paraprakisht për ushtrimin, me qëllim që të shmangte shqetësimin e qytetarëve. Pas testit, autoritetet sqaruan se disa përdorues mund të mos e kenë marrë mesazhin për arsye të ndryshme, si mungesa e sinjalit, aktivizimi i modalitetit të aeroplanit, çaktivizimi i alarmit të emergjencës në cilësimet e pajisjes, mungesa e aktivizimit për 4G/5G, ose fikja e plotë e telefonit.
Sipas reagimit zyrtar, testi zgjati vetëm disa sekonda, por ka një rëndësi të madhe për sigurinë kombëtare. “Herën tjetër që dëgjoni sirenën, mund të jetë një emergjencë e vërtetë, prandaj qëndroni të qetë dhe ndiqni udhëzimet,” thuhet në deklaratë.
Ky sistem është konceptuar për të funksionuar në situata të rrezikshme si mot ekstrem, përmbytje ose zjarre. Ai u testua për herë të parë në prill 2023 dhe që nga ajo kohë është përdorur pesë herë për paralajmërime të vërteta.
Ndër rastet e përdorimit real përfshihet janari i këtij viti gjatë stuhisë “Eowyn”, kur qytetarët në Skoci dhe Irlandën e Veriut u paralajmëruan për kushte të rënda atmosferike. Në një tjetër rast, në shkurt të vitit të kaluar, sistemi njoftoi banorët e Plymouth për një bombë të pashpërthyer 500 kg nga Lufta e Dytë Botërore, e gjetur në një oborr privat.
Autoritetet theksojnë se këto paralajmërime mund të bëjnë diferencën mes sigurisë dhe rrezikut, duke u bërë thirrje qytetarëve të mos i injorojnë njoftimet dhe të reagojnë sipas udhëzimeve që shfaqen në ekran.
