Trajneri i Kombëtares, Silvinjo, foli hapur për vendimin e Bajramit për të ndryshuar federatë dhe tregoi situatën aktuale të sulmuesit Armando Broja
Trajneri i Shqipërisë, Silvinjo, doli dje para mediave në prag të miqësores kundër Gjibraltarit, që shërben si provë gjenerale për ndeshjen vendimtare ndaj Letonisë në Tiranë. Ai pranoi se ekipi duhet të përgatitet maksimalisht, pasi Letonia është një kundërshtar fizikisht i fortë dhe i organizuar.
Duke komentuar për situatën e Bajramit, tekniku brazilian tha se gjithçka ishte e qartë pas një telefonate 30-minutëshe me lojtarin, ku mori vesh se ai kishte vendosur të ndërrojë federatë. “I uroj më të mirën. Këto gjëra ndodhin shpesh në futboll, nuk ndjej asnjë faj,” – deklaroi Silvinjo, duke kujtuar edhe raste të ngjashme nga përvoja e tij në Brazil.
Për përzgjedhjet në ekip, trajneri theksoi se mungesat për shkak dëmtimesh nuk janë justifikim dhe se ka besim të plotë te lojtarët e thirrur, si Kacurri, Shpendi dhe Çokaj. Ai konfirmoi se portieri Simoni është thirrur për të zëvendësuar Kastratin, i cili nuk ishte në gjendje optimale fizike.
Sa i përket Armando Brojës, Silvinjo dha një lajm pozitiv, duke theksuar se sulmuesi është pa probleme fizike dhe po përshtatet me klubin e ri në Angli. “Është i ri, ka nevojë të luajë, të marrë eksperiencë dhe të ndihmojë ekipin. Po bën progres dhe është në formë të mirë,” – u shpreh ai.
Tekniku nënvizoi rëndësinë e dy ndeshjeve që vijnë, duke e cilësuar sfidën me Letoninë si vendimtare. “Jemi mësuar të luajmë nën trysni. Duhet të përgatitemi mirë dhe të japim maksimumin, nuk kemi asnjë shans tjetër,” – tha ai me vendosmëri.
Në fund, Silvinjo theksoi se marrëdhënia me lojtarët është transparente dhe se puna e përditshme me stafin dhe Federatën është e orientuar vetëm drejt suksesit të Kombëtares. Ai garantoi se pavarësisht situatave të papritura, ekipi është i fokusuar dhe gati për sfidat që e presin.
