Era e fortë dhe reshjet e dendura kanë paralizuar aeroportin e Rinasit, duke shkaktuar anulime, vonesa dhe probleme të shumta në disa qytete të vendit.
Një stuhi e fuqishme ka goditur sot Shqipërinë, duke sjellë erëra të forta dhe reshje të dendura shiu në disa qarqe. Tiranë, Durrës, Vlorë dhe Lezhë janë ndër zonat më të prekura, ku raportohen përmbytje dhe dëme të konsiderueshme materiale.
Në Aeroportin Ndërkombëtar të Tiranës “Nënë Tereza” fluturimet janë ndërprerë përkohësisht, pasi pista u përfshi nga erëra të forta dhe reshje të pandërprera. Dy avionë, një nga Parisi dhe një nga Varshava, u detyruan të qëndrojnë në ajër mbi det, pasi nuk arritën të ulen në kohë.
Pamjet nga terminalet tregojnë ambiente të mbushura me pasagjerë që presin nisjen drejt vendeve të BE-së dhe destinacioneve të tjera. Për shkak të motit të keq, dhjetëra itinerare kanë pësuar vonesa, ndërsa disa fluturime janë shtyrë për orë të tëra ose janë anuluar.
Reshjet e dendura kanë nisur në Tiranë, më pas kanë përfshirë Durrësin, ku një pjesë e madhe e qytetit është zhytur nën ujë, për t’u shtrirë më pas edhe në Vlorë. Në kryeqytet, përveç dëmeve në biznese, dy persona janë paraqitur në spital me dëmtime në fytyrë, njëri prej tyre nga thyerja e një xhami.
Në Zall Bastar, era e fortë rrëzoi telat e tensionit në rrugë, ndërsa në Durrës qarkullimi i automjeteve u vështirësua në disa akse. Lundrimi i anijeve të vogla është pezulluar deri në përmirësimin e kushteve atmosferike.
Shërbimi meteorologjik paralajmëron se stuhia pritet të vazhdojë deri nesër. Autoritetet u bëjnë thirrje qytetarëve të shmangin lëvizjet e panevojshme për të reduktuar rrezikun nga kushtet ekstreme të motit.
