15.2% e shqiptarëve mbi 16 vjeç nuk kanë marrë shërbimin mjekësor që u nevojitej në vitin 2024, duke e vendosur vendin në krye të listës europiane.
Të dhënat e publikuara nga Eurostat tregojnë një panoramë shqetësuese për sistemin shëndetësor shqiptar. Në vitin 2024, Shqipëria shënoi përqindjen më të lartë në Europë të popullsisë mbi 16 vjeç me nevoja mjekësore të paplotësuara, duke arritur në 15.2%. Ky nivel është shumë më i lartë krahasuar me mesataren e Bashkimit Europian prej vetëm 3.8%.
Në vendet e rajonit, diferencat janë të mëdha: Mali i Zi ka vetëm 2.8% të popullsisë me nevoja të paplotësuara, Serbia 8.2%, ndërsa Maqedonia e Veriut 6%. Për Kosovën dhe Bosnjë-Hercegovinën mungojnë të dhënat. Shqipëria dhe Greqia kryesojnë në rajon për këtë problem, me Greqinë që regjistron 13.4%.
Arsyeja më e përhapur në Shqipëri për mungesën e trajtimit mjekësor lidhet me kostot e larta. Plot 8.8% e qytetarëve e kanë përmendur këtë si pengesën kryesore, një përqindje shumë më e lartë se mesatarja europiane prej vetëm 1%, dhe e dyta më e larta në kontinent pas Greqisë (9.1%).
Lista e pritjes është një tjetër faktor që pengon marrjen e shërbimit shëndetësor, me 1.1% të shqiptarëve që raportojnë këtë problem. Ndërkohë, 0.3% e popullsisë përmendin largësinë e udhëtimit drejt spitaleve si arsye kryesore.
Një tjetër element interesant është përqindja e atyre që zgjedhin të presin duke shpresuar se gjendja shëndetësore do të përmirësohet vetë. Me 2% të përgjigjeve, Shqipëria renditet e treta në Europë pas Danimarkës (3.3%) dhe Norvegjisë (2.4%), dhe shumë mbi mesataren e BE-së prej 0.4%.
Në nivel europian, kostot e larta dhe listat e gjata të pritjes janë dy arsyet që përbëjnë më shumë se gjysmën e rasteve të nevojave mjekësore të paplotësuara. Në Shqipëri, këto dy faktorë mbeten më problematikët, duke nxjerrë në pah një sfidë të madhe për sistemin shëndetësor dhe për qasjen e qytetarëve tek shërbimet bazë mjekësore.
