Shkarkimi i Robert Primus nga Bordi i Transportit ka ndezur debat politik e ligjor, ndërsa ai refuzon të dorëhiqet nga posti i tij
Shtëpia e Bardhë ka konfirmuar se ka larguar nga detyra Robert Primus, një anëtar i emëruar nga demokratët në Bordin Federal të Transportit Sipërfaqësor (STB), me arsyetimin se ai nuk përputhet me axhendën “America First” të Presidentit Donald Trump. Megjithatë, Primus ka deklaruar publikisht se nuk ka ndërmend të tërhiqet.
Zëdhënësi i Shtëpisë së Bardhë, Kush Desai, tha për “Politico” se Trump synon të emërojë “anëtarë më të kualifikuar” në bordin që mbikëqyr bashkimet e kompanive të mëdha të transportit hekurudhor. Ky zhvillim ndodh në një moment të ndjeshëm për institucionin.
Në një postim në LinkedIn, Primus e cilësoi vendimin “thellësisht shqetësues dhe juridikisht të pavlefshëm”. Ai shtoi se do të vijojë detyrën si anëtar i bordit dhe nëse pengohet, do të ndjekë rrugën ligjore për ta kundërshtuar.
Primus mbrojti gjithashtu bilancin e tij gjatë mandatit në STB, ku shërben që nga emërimi i tij nga vetë Trump në vitin 2020. Ai ka qenë një nga zërat kritikë në disa vendime të mëdha, përfshirë kundërshtimin ndaj bashkimit 28 miliardë dollarësh mes Canadian Pacific dhe Kansas City Southern në vitin 2023.
Shkarkimi i tij vjen ndërsa bordi po shqyrton një marrëveshje prej 85 miliardë dollarësh mes Union Pacific dhe Norfolk Southern, e cila, nëse miratohet, do të reduktonte numrin e kompanive më të mëdha të mallrave hekurudhore në SHBA në vetëm pesë.
Pas largimit të Primus, bordi me pesë anëtarë, që kërkon konfirmim nga Senati, do të ketë një demokrat dhe dy republikanë, ndërkohë që ligji e ndalon që më shumë se tre anëtarë të jenë nga i njëjti parti.
Reagimet nuk kanë munguar nga sindikatat e punëtorëve të hekurudhave. Organizata SMART-TD e quajti vendimin “të paprecedent dhe të pajustifikuar”, duke sugjeruar ndikim të jashtëm nga industria. Ata theksuan se heqja e një pozicioni të konfirmuar nga Senati vetëm për shkak të mospërputhjes me interesat e korporatave përbën një sulm ndaj pavarësisë së mbikëqyrjes federale.
Nga ana tjetër, Shoqata e Hekurudhave Amerikane, ku bëjnë pjesë si Union Pacific ashtu edhe Norfolk Southern, deklaroi se vlerëson rolin kritik të STB dhe marrëdhëniet e mira të punës me anëtarët dhe stafin e saj, marrëdhënie që sipas tyre do të vijojnë pavarësisht përbërjes së bordit.
Ky zhvillim është pjesë e një tensioni më të gjerë në administratën Trump, pas largimeve të fundit të guvernatores së Rezervës Federale Lisa Cook dhe drejtoreshës së CDC, Susan Monarez, të cilat gjithashtu refuzuan të linin postin.
Në thelb, çështja Primus mund të kthehet në një betejë të gjatë ligjore, ku përplasja mes axhendës politike të Shtëpisë së Bardhë dhe pavarësisë institucionale të një bordi federal do të jetë në qendër të vëmendjes.
